12 سال سے نہ انتقال ملا نہ قبضہ، کاسی بحریہ ٹاؤن کوئٹہ کے 400 الاٹیز کا احتجاج کوئٹہ (رپورٹ کوئٹہ نیوز نیٹ ورک ) کاسی بحریہ ٹاؤن کوئٹہ کے الاٹیز ایکشن کمیٹی کے زیر اہتمام الاٹیز نے اپنے مسائل کے حل کے لیے احتجاجی مظاہرہ اور میٹنگ کی، جس میں کاسی بحریہ ٹاؤن کے تقریباً 400 الاٹیز کو درپیش مشکلات پر تشویش کا اظہار کیا گیا۔ الاٹیز ایکشن کمیٹی کے مطابق متعدد الاٹیز گزشتہ 12 سال سے اپنے پلاٹس کے حصول کے منتظر ہیں، جبکہ کئی الاٹیز پلاٹس کی 80 فیصد یا اس سے زائد رقم نقد یا اقساط کی صورت میں ادا کرچکے ہیں، تاہم انہیں تاحال انتقال اور قبضہ نہیں دیا گیا۔ کمیٹی نے مطالبہ کیا کہ 80 فیصد یا اس سے زائد رقم ادا کرنے والے الاٹیز کو فوری طور پر انتقال اور قبضہ دیا جائے، جبکہ کاسی بحریہ ٹاؤن میں بنیادی سہولیات اور ترقیاتی کام بھی فوری شروع کیے جائیں تاکہ الاٹیز اپنے پلاٹس پر گھروں کی تعمیر کرسکیں۔ الاٹیز ایکشن کمیٹی نے اسکیم میں موجود ڈی ایچ اے سے متعلق بورڈز فوری ہٹانے کا بھی مطالبہ کیا اور کہا کہ اس معاملے کے باعث الاٹیز میں تشویش اور بے یقینی پائی جاتی ہے۔ کمیٹی نے کور کمانڈر بلوچستان، وزیراعلیٰ بلوچستان، گورنر بلوچستان، ڈپٹی کمشنر کوئٹہ، سینئر ممبر بورڈ آف ریونیو، صوبائی کابینہ اور بلوچستان اسمبلی سے اپیل کی کہ کاسی بحریہ ٹاؤن کے الاٹیز کے فوری حل طلب مسائل کا نوٹس لے کر ان کے جائز مطالبات حل کرائے جائیں۔ الاٹیز ایکشن کمیٹی نے کاسی بحریہ ٹاؤن انتظامیہ سے بھی مطالبہ کیا کہ الاٹیز کا اعتماد بحال کرنے کے لیے واضح ٹائم فریم دیا جائے اور عملی اقدامات شروع کیے جائیں تاکہ 12 سال سے جاری انتظار اور پریشانی کا خاتمہ ہوسکے۔ #KasiBahriaTownQuetta #Quetta #Balochistan #Allottees #QuettaNewsnetwork - @quettanewsnetwork777