@user4882323249150: وده اللي خلاني أشوف لعبة جهنم أكبر بكتير من مجرد مسلسل حسن قالها الشيخ علاء : طيب أوي يا ماما ... الجملة دي بسيطة، بس وراها معنى كبير جدًا. لأن ده بالظبط اللي ممكن يحصل مع طفل لسه معندوش الوعي الكافي؛ أي حد يعامله كويس أو يسمعه أو يحسسه إنه فاهمه، ممكن يشوفه شخص طيب ويثق فيه، حتى لو إحنا شايفين العكس تمامًا. وده بيرجعنا لنقطة مهمة جدًا أهلنا لازم يعرفوا العالم اللي عيالهم عايشين فيه. خصوصًا مع التطور الكبير في التكنولوجيا… الطفل ممكن يكون عايش مع أهله في نفس البيت، لكن في عالم تاني خالص على الموبايل، بيتكلم مع مين، وبيثق في مين، ومين بيأثر عليه… وأهله مش واخدين بالهم. وده ظهر جدًا في المسلسل مع حسن. لما رجع من عند الشيخ علاء، أبوه لاحظ إنه ماسك الكتاب ، ف حسن بيوريه ليه مسكه بالمشقلب عشان شكله مكانش بيعرف يقرأ ويكتب كويس، فقاله أحسن حاجة عملتها إنك تتعلم في الدين ... بس هنا السؤال اللي المسلسل بيخلينا نفكر فيه إنت عرفت هو بيتعلم إيه… لكن عرفت مين اللي بيعلمه؟ ومين الشخص الكبير اللي مصاحبه ورايح جاي معاه؟ حتى أمه قالت جملة في الأول كأنها عادية "هو كل واحد صلى في زاوية يا ابو حسن بقى شيخ " والمفارقة إن كلامها طلع في محله. أما سليم، فالموضوع عنده أعمق من مجرد شخص شرير. أنا مش عايز أقول إنه ضحية لأهله بشكل مطلق، لأن في الآخر كل إنسان مسؤول عن اختياراته… لكن المسلسل بيورينا إزاي الظروف ممكن تفتح جوا الإنسان باب للشر. سليم عاش صدمة كبيرة من وهو صغير بعد ما شاف أخوه بيموت قدام عينه، ومع الوقت بقى عنده إحساس إن أهله مش موجودين معاه بالشكل اللي هو محتاجه. أب مشغول بالغربة وشغله وعملياته وجمع الفلوس عشان الفيلا والشاليه ومستقبل ابنه… لكن ابنه نفسه كان عايش في عالم تاني؛ عالم الإنترنت والبيتكوين والدارك ويب ، وكل يوم حالته النفسية وصراعه مع نفسه بيزيدوا. ومع الوقت، بقى مش عارف يتعامل مع الناس، ولا يدخل معاهم في نقاش بشكل طبيعي، وكل رفض أو خلاف كان بيزود جواه الإحساس بالغضب والانتقام. ونفس الفكرة شفناها مع علاء نفسه علاء كمان كان جواه جزء مكسور من زمان… أب قاسي عليه، ضـ ـربه وعذ به وهو صغير، فكبر وهو شايل جواه الخير والشر، ومع الظروف والوحدة، بقى الجزء المكسور ده هو المدخل اللي الشيطان عرف يدخل منه. "فَاسْتَحْوَذَ عَلَيْهِمُ الشَّيْطَانُ فَأَنسَاهُمْ ذِكْرَ اللَّهِ " والأقسى إن الشيطان في النهاية بيعمل نفس الحاجة مع الإنسان يستدرجه خطوة ورا خطوة، لحد ما يقع في الذنب… وبعدها يسيبه. وساعتها تلاقيه يوم القيامة بيقول له: معرفكش.. مشفتكش.. مقابلتكش وده يمكن من أهم الحاجات اللي عجبتني في لعبة جهنم. المسلسل مش بيتكلم بس عن جريمة أو قاتل أو عالم مظلم على الإنترنت… هو بيحط إيده على حاجات موجودة حوالينا كل يوم: على الأسرة لما تنشغل عن أولادها وهي فاكرة إنها بتوفر لهم حياة كويسة. على الطفل اللي ممكن يكون قدامك، لكن عالمه الحقيقي بعيد عنك تمامًا. على إنك مش كفاية تعرف ابنك بيعمل إيه… لازم تعرف بيكلم مين، وبيثق في مين، ومين بيدخل دماغه وبيأثر عليه. وعلى الإنسان نفسه… إزاي نقطة ضعف واحدة جواه، لو محدش خد باله منها، ممكن تكون الباب اللي يدخل منه الشيطان. 📸لعبة جهنم
