நற்பிட்டிமுனையின் முதலாவது பெண் வைத்தியராக வரலாறு படைத்த மஹ்மூது பாத்திமா ஷிரின்! Kattankudy.lk நற்பிட்டிமுனை மண்ணுக்கு பெருமை சேர்க்கும் வகையில், அப்பிரதேசத்தின் முதலாவது பெண் வைத்தியராக மஹ்மூது பாத்திமா ஷிரின் தெரிவுசெய்யப்பட்டுள்ளார். வைத்தியத்துறைக்கு மாணவர்கள் தெரிவுசெய்யப்படுவது மிகவும் கடினமாக இருந்த காலகட்டமான 1986ஆம் ஆண்டு, நற்பிட்டிமுனையின் முதலாவது வைத்தியராக Dr. M.C. மாஹிர் தெரிவுசெய்யப்பட்டார். அவரைத் தொடர்ந்து பலர் வைத்தியத்துறையில் இணைந்த போதிலும், நற்பிட்டிமுனையைச் சேர்ந்த பெண்கள் பலர் விஞ்ஞானத் துறையில் கல்வி கற்றிருந்தும், வைத்தியத்துறைக்கு இதுவரை எவரும் தெரிவுசெய்யப்படவில்லை. இந்நிலையில், மஹ்மூது பாத்திமா ஷிரின் பல்கலைக்கழகத்தில் வைத்தியக் கற்கைநெறியை வெற்றிகரமாக நிறைவு செய்து, நற்பிட்டிமுனையின் முதலாவது பெண் வைத்தியர் என்ற வரலாற்றுப் பெருமையை தனதாக்கியுள்ளார். அவர் கடந்த 2026 ஆகஸ்ட் 28ஆம் திகதி முதல் அம்பாறை பொது வைத்தியசாலையில் பயிற்சி வைத்தியராக (Internship) தனது பணியை ஆரம்பித்துள்ளார். நற்பிட்டிமுனை மண்ணின் வைத்தியத்துறையில் பெண்களின் பிரதிநிதித்துவம் இல்லாத குறையை நிவர்த்தி செய்து, புதிய வரலாற்றைப் படைத்துள்ள மஹ்மூது பாத்திமா ஷிரினுக்கு பிரதேச மக்கள் வாழ்த்துகளைத் தெரிவித்து வருகின்றனர். #Narpittimunai #NarpittimunaiNews #FirstFemaleDoctor #FemaleDoctor #Doctor - @kattankudy.lk