Evini sökən elskavatora vətəndaşın “molotov kokteyli” atmasından 2 il keçir 31 avqust 2024-cü ildə Bakının Nəsimi rayonunda, “Papanin” kimi tanınan ərazidə evinin sökülməsinə etiraz edən vətəndaş tikinti şirkətinə məxsus ekskavatora “Molotov kokteyli” atıb yandırdı. Hadisə “PİLOT-16” MMC şirkəti və söküntü aparıldığı ərazidə yaşayan ev sahibləri arasında uzun müddətdir davam edən mübahisə fonunda baş vermişdi. Mənzil Məhbubə Quliyevaya məxsus idi. Ailə bildirirdi ki, evin sökülməsi və kompensasiya ilə bağlı şirkətlə hər-hansı bir razılığa gəlmədikləri halda şirkət tərəfindən qanunsuz olaraq onların mülkiyyətinə dəfələrlə müdaxilə edilib. Hadisədən əvvəl, 18 mart 2023-cü ildə Quliyevanın evinin bir hissəsi şirkət tərəfindən sökülmüşdü. Bundan əlavə, Quliyeva şirkətin işçilərinin onun evinin ətrafında gecə saatlarında, habelə istirahət günləri səhər erkən saatlarda söküntü işləri apararaq, traktor ilə yer qazaraq, ona və ailə üzvlərinə psixoloji təzyiq və işgəncə verdiyini bildirmişdi. Ərazidə yaşayan sakinlərin sözlərinə görə, ağır texnikanın yaratdığı səs-küy onlara gecələr yatmağa imkan vermir, gündəlik həyatlarını kobud şəkildə pozurdu. 31 avqust 2024-cü ildə isə “PİLOT-16” MMC-nin fəhlələri gecə saatlarında ərazidə söküntü apararkən bu dəfə başqa mənzərə ilə üzləşdilər. Həmin gün Məhbubə Quliyevanın qardaşı Əsəd (soyadı ictimaiyyətə açıqlanmayıb) etiraz olaraq, ərazidə söküntü aparan ekskavatora “Molotov kokteyli” atmış, nəticədə ekskavator alışaraq yanmışdı. O, sonradan məhkəmədə bildirmişdi ki, məqsədi ekskavatoru yandırmaq deyil, söküntüyə gələn işçiləri qorxutmaq olub. Əsədin sözlərinə görə, işçilər onu görəndə “vurun onu” deyiblər. “PİLOT-16” MMC şirkəti bu hadisənin onlara 210 min manat ziyan vurduğunu iddia etmişdi. 2025-ci ilin mayında isə məhkəmə Əsədi 3 il müddətinə azadlıqdan məhrum etdi və o, məhkəmə zalında həbs olundu. Bu hadisə ictimaiyyət tərəfindən təkcə bir ekskavatorun yandırılması kimi qəbul edilməmişdi. Vətəndaşın öz hüquqlarının qorunduğuna inamının sarsıldığı, məhkəmə qərarlarının və uzun sürən hüquqi proseslərin bu cür mübahisələri həll edə bilmədiyi bir şəraitdə qarşıdurmanın küçəyə və daha təhlükəli etiraz formasına keçməsinin göstəricisi idi. Bu, həm də vətəndaşların öz hüquqlarının qorunmadığı ölkədə dövlət institutlarına arxalanmalı olduğunu düşünmədiyini, məsuliyyəti öz üzərinə götürərək, müqavimət göstərməsinin nümunəvi təzahürü idi. 31 avqustda yanan ekskavator da məhz belə hüquqsuzluqlara qarşı müqavimətin simvoluna çevrildi. - @teqvim.info