@wajdi.alhakim: قبل ما ترحل ياسمين.. كانت هي اللي شافت حب أمها نجلاء فتحي من بعيد، وكانت أول واحدة تقول لها: "ممكن تتجوزيه". نجلاء فتحي حبت الكاتب الكبير حمدي قنديل حب حقيقي، وكانت دايمًا تتكلم عنه بإعجاب كبير، وتقول: "بحس إني تلميذة وأنا معاه.. هو أول راجل يفتني، ومش سهل ده يحصل، وكل يوم باكتشف فيه حاجة جديدة." كانت شايفاه مش بس رجل أحبته، لكن إنسان أضاف لحياتها، وخلّاها تكتشف كل يوم فيه حاجة جديدة. وبداية الحكاية كانت بسيطة جدًا.. حمدي كان بيشوف نجلاء بشكل شبه يومي لمدة حوالي 3 شهور، وكان دايمًا يعزمها على الغدا، لحد ما بدأت المسافة بينهم تقصر، وبدأ الإعجاب يتحول لحب. وفي مرة، كانت نجلاء معاها بنتها ياسمين، وكانت وقتها لسه في سن المراهقة. قعدت ياسمين معاهم في العربية، والجو كان كله هزار وضحك. نجلاء قالت لحمدي: "متجريش بالعربية." فردت ياسمين وهي بتهزر: "لا اجري.. خلينا نخوفها!" ضحكوا التلاتة ، لكن لما رجعوا البيت، قالت ياسمين لمامتها جملة صغيرة، من غير ما تعرف إنها هتفضل محفورة في ذاكرتها: "على فكرة يا ماما.. ممكن تتجوزيه." نجلاء استغربت وسألتها: ليه؟فقالت لها: "عمو حمدي مناسب ليكي أوي." يمكن ياسمين وقتها كانت بتتكلم ببساطة بنت صغيرة شايفة إن الشخص ده مناسب لمامتها.. لكن كلامها جه في مكانه تمامًا. وبعد فترة، اتصل حمدي بنجلاء يطمن عليها، فقالت له من غير مقدمات: "هتجوزك النهاردة." وحمدي نفسه حكى في مذكراته عن اللحظة دي، وقال إنه رد عليها والفرحة بتغزو قلبه: "عظيم.. عظيم." وبالفعل، بدأت بينهم حياة جديدة، استمرت لسنوات طويلة، وكان الحب والونس والاحترام هم عنوان علاقتهم. لحد ما رحل حمدي قنديل في 31 أكتوبر 2018، بعد معاناة مع المرض. وقتها فقدت نجلاء فتحي زوجها وحبيبها ورفيق سنوات طويلة من عمرها.. لكن كان لسه عندها ياسمين.. ابنتها الوحيدة، والجزء الأهم من حياتها واليوم.. ترحل ياسمين هي الأخرى، عن عمر 44 عامًا، إثر أزمة قلبية مفاجئة.. وهكذا، في سنوات قليلة، فقدت نجلاء فتحي الرجل الذي أحبته، ثم فقدت ابنتها الوحيدة.. رحم الله ياسمين، وربط على قلب والدتها نجلاء فتحي ووالدها سيف أبو النجا، وكل أهلها ومحبيها. إنا لله وإنا إليه راجعون. *الصورة المرفقة لنجلاء فتحي في جنازة ابنتها #نجلاء_فتحي #حمدي_قنديل #ياسمين_سيف_أبو_النجا #وجدي_الحكيم

Wajdi AlHakim

Open In TikTok:

Region: EG

Monday 31 August 2026 13:26:56 GMT