አቤቱ የነገሥታት ንጉሥ፣ የጌቶች ጌታ፣ የሕይወታችን ብርሃን የሆንክ ልዑል እግዚአብሔር ሆይ፤ የሞት ጥላ የሆነውን የሌሊት ጨለማ ገፈህ፣ ይህንን ውብ ማለዳ ስላሳየኸን የከንፈራችንን ፍሬ፣ የምስጋና ነዶ በፊትህ እናቀርባለን። አንተ ታላቅ፣ ቸርና ታማኝ አምላክ ነህና ስምህ ከዘላለም እስከ ዘላለም ከፍ ከፍ ይበል።አባታችን ሆይ፤ በዚህ ቅዱስ ማለዳ ራሳችንን በፊትህ ዝቅ አድርገን፣ ምህረትህን እንማጸናለን። በሀሳብ፣ በቃልም ሆነ በድርጊት አንተን ያሳዘንበትን፣ ከፈቃድህ ያፈነገጥንበትንና መንፈስህን ያስከፋንበትን በደላችንን ሁሉ በልጅህ በኢየሱስ ክርስቶስ ክቡር ደም አጥበህ አንጻን፤ ዛሬን በንጹህ ህሊና እንድንጀምር እርዳን።ጌታ ሆይ፤ ስለ ምድራችን፣ ስለ ሀገራችንና ስለ ህዝባችን ፊትህ እንጮሃለን። እውነተኛ ሰላምህን፣ ፍቅርህንና መግባባትህን በምድራችን ላይ አፍስስ። ጥላቻንና መለያየትን ከመካከላችን አስወግደህ፣ በምህረትህ ጎብኘን፤ ምድሪቱንም በበረከትህ ፈውሳት።አምላካችን ሆይ፤ አሁን ደግሞ በፊታችን ያለውንና እየመጣ ያለውን አዲስ ዓመት ሙሉ በሙሉ በእጅህ አደራ እንሰጣለን። አዲሱ ዓመት የንስሐ፣ የሰላም፣ የጤናና የተስፋ ዘመን ይሁንልን። ክፉውን የምናሸንፍበት፣ ጠላትን የምንረግጥበት፣ ያሰብነው መልካም ነገር ሁሉ የሚሳካበት የድልና የስኬት ዓመት አድርግልን።አቤቱ፣ መንፈሳዊ ሕይወታችንን ከመቼውም ጊዜ በላይ አድሰው። ቃልህን እንድንወድ፣ በጸሎት እንድንተጋና በመንፈስ ቅዱስ ምሪት እንድንመላለስ ጸጋህን አብዛልን። ከዓለም መሳሳብ ነጻ ወጥተን፣ አካሄዳችንን ሁሉ አንተን ደስ ወደሚያሰኝ የቅድስና ሕይወት መልሰው።የዛሬውንም አዲስ ውሎ፣ እርምጃችንንና ስራችንን ሁሉ ባርክ፤ በመውጣት በመግባታችን አንተው ፊት ፊት ቀድመኸን ውጣ፤ ዙሪያችንንም በመላእክትህ አጥር። ይህንን ጸሎትና ልመና፣ አዳኛችን፣ ታዳጊያችንና የሕይወታችን ራስ በሆነው በጌታችን በኢየሱስ ክርስቶስ ሕያውና ቅዱስ ስም አቀረብን፤ አሜን!! - @abenezereabageda