@openonlinemedia: Waziri wa Nchi, Ofisi ya Rais, Mipango na Uwekezaji, Prof. Kitila Mkumbo, amesema Serikali itaendelea kuweka mkazo katika kuboresha mazingira ya kazi na kulinda heshima na haki za madereva nchini, akisisitiza kuwa kundi hilo ni nguzo muhimu katika sekta ya usafiri na usafirishaji. Prof. Mkumbo ameyasema hayo leo Septemba Mosi, 2026 Bungeni jijini Dodoma wakati akiongezea majibu ya Naibu Waziri kuhusu hoja ya Mbunge wa Mlalo, Mhe. Rashid Abdallah Shangazi, iliyohusu changamoto mbalimbali zinazowakabili madereva nchini. Amesema sekta ya usafiri na usafirishaji ni miongoni mwa sekta muhimu zinazochochea ukuaji wa uchumi wa Tanzania, ikichangia asilimia 8.5 ya uchumi na kutoa ajira kwa takribani asilimia 4.4 ya nguvu kazi nchini. Kwa mujibu wa Prof. Mkumbo, Tanzania inakadiriwa kuwa na madereva kati ya milioni 1.1 hadi 1.3, idadi inayoonesha kwa kiasi kikubwa nafasi yao katika kuendesha shughuli za kiuchumi na kijamii. Amesema kupitia Mpango wa Maendeleo wa Miaka Mitano, Serikali imelenga kuongeza ajira zenye staha na hivyo itaendelea kutoa kipaumbele kwa sekta hiyo, ikiwemo kuhakikisha madereva wanapata mazingira bora ya kutekeleza majukumu yao. Aidha, Prof. Mkumbo ameshauri kuwa endapo kutabainika vitendo vya dhuluma, uonevu au ukiukwaji wa haki dhidi ya madereva, Tume ya Haki za Binadamu na Utawala Bora inapaswa kufuatilia changamoto hizo na kuhakikisha haki za madereva zinalindwa. Amesisitiza kuwa uboreshaji wa mazingira ya kazi kwa madereva ni sehemu muhimu ya kujenga sekta ya usafiri na usafirishaji yenye tija, inayoheshimu utu na inayochangia kikamilifu maendeleo ya taifa. #Pakua App ya #OpenMedia playstore kusikiliza #DoubleORadio na kutazama #OpenMTV au kupitia tovuti #openmedia.co.tz, Kwa Matukio, Habari na Matangazo wasiliana nasi 0677107271 au 0677107273.

Open Online Media

Open In TikTok:

Region: TZ

Tuesday 01 September 2026 09:52:11 GMT