@.gueen681: #البيــــــــــــــــــني_بيـــــــــــــــــــــنك البيني بينك ما كلام عابر ولا لحظة ساي بتفوت، البيني بينك ريدة اتربّت في القلب، ومحبة كبرت يوم ورا يوم، وعشق ما لقى ليهو نهاية. أنا من زمن كنت قايل كل القلوب بتحب بنفس الطريقة، وكل الناس لما تقول «بحبك» بتكون قاصدة نفس الإحساس… لكن يدابك عرفت إنو العواطف بتختلف، وإنو في زول ممكن يحبك لحدي ما ينسى نفسو، وزول تاني ممكن يكون قريب منك وما يكون حاسس بيك قدر إحساسك بيهو. البيني بينك زي فراش، مرة يرفرف حولينا ويخلينا نحس إنو الدنيا كلها خفيفة، ومرة يطير بعيد ونقعد ندوّر في أثره وما نلقاهو. وزي زهرة قايمة على الجرف، جميلة شديد، لكن واقفة في مكان الخوف… الريح ممكن تهزها، والبرد ممكن يتعبها، لكن برضو بتظل واقفة ومزروعة في مكانها. أنا ما عارف البيني بينك حكاية مكتوبة لينا ولا حلم ساكن فينا، لكن العارفو إنك بقيت جزء من تفاصيل أيامي. بقيت لما أشوف حاجة حلوة أتمنى تشوفها معاي، ولما أسمع كلام جميل أتذكرك، ولما الليل يطول عليّ أسأل روحي: يا ترى إنت في بالك زي ما إنت في بالي؟ يمكن الزمن يفرقنا، ويمكن المسافات تكبر، ويمكن الكلام يقل بيناتنا، لكن في حاجات ما بتحتاج كلام عشان تثبت وجودها. البيني بينك ساكن في القلب، مهما حاولنا نخبّيه، ومهما قلنا انتهى، يرجع يظهر في نظرة، في أغنية، في ذكرى، أو حتى في صمت طويل ما قادرين نفسرو. يا ريت العواطف كانت متشابهة، ويا ريت كل قلب يدي نفس القدر البياخدو، لكن الدنيا ما ماشّة كدا. في زول يحب بصدق، وفي زول يخاف من الحب، وفي زول يجي متأخر بعد ما القلب يكون تعب من الانتظار. لكن رغم كل الحاصل، أنا ما بنكر إنو البيني بينك كان جميل… جميل زي فراشة لقت وردتها، وزهرة قايمة على الجرف بتقاوم الريح وما بتنكسر. ويمكن أجمل حاجة في قصتنا إنو مهما اختلفت العواطف، ومهما اتبدلت الأيام، كان في يوم من الأيام بيني وبينك ريدة… ومحبة… وعشق… ولف.

Gueen🫅(خضار القلب)

Open In TikTok:

Region: SD

Tuesday 01 September 2026 16:44:26 GMT