@coachmonaboshra: "طب لو سيبته… مش هيعمل حاجة!" ممكن فعلًا في الأول ما يعملش. وممكن ينسى الواجب، أو يدخل كويز مش مستعد له، أو يجيب تقييم أقل. وهنا بييجي الجزء الصعب علينا كأهالي: منجريش ننقذه من كل نتيجة. طالما المطلوب مناسب لسنه وهو قادر يعمله، خليه يجرب ويتحمل نتيجة تقصيره. وده مش معناه إننا نسيبه لوحده تمامًا. مركز Center on the Developing Child بجامعة Harvard بيشرح إن مهارات مهمة زي التخطيط، التركيز، تذكّر المطلوب وتنظيم النفس بتتطور بالممارسة. ودور الكبار في البداية يكون دعم الطفل في المهام الصعبة، وبعدها يقل الدعم تدريجيًا كل ما الطفل يبقى قادر يدير المهمة بنفسه ويتعلم من أخطائه. يعني باختصار: ساعديه يعمل جدول… بس متفتكريش الجدول مكانه. علميه يجهز شنطته… بس متجهزيهاش كل يوم مكانه. فكريه في البداية… وبعد فترة سيبيه هو يفتكر. ولو نسي حاجة مرة، متجريش تنقذيه كل مرة. أحيانًا كويز صغير ضاع أو تقييم قليل بيكون فرصة آمنة يتعلم منها المسؤولية قبل ما يكبر وتبقى نتائج عدم المسؤولية أكبر بكتير. وطبعًا كل ده حسب سن الطفل وقدراته واحتياجه للدعم. السؤال بقى: إيه الحاجة اللي ابنك بقى قادر يعملها لوحده… ولسه إنتِ بتعمليها مكانه؟ المصدر: Center on the Developing Child at Harvard University# #fypage #explore #عودة_المدارس .
