معلش حابة أوضح نقطة مهمة جدًا، عشان كلامي مايتفهمش بشكل غير اللي أنا أقصده. أنا أصلًا ما اتكلمتش عن طلاب الثانوية المصرية، ولا كلامي كان موجه ليهم بأي شكل. كل طالب له نظامه وظروفه ومجهوده، وأنا مقدرش أحكم على تعب حد أو أقلل من إنجاز أي طالب. وبالنسبة لي، أي طالب جايب 70% أو 60% في مصر هو طالب متفوق في نظامه، تعب واجتهد وربنا وفقه. ومنهم صحابي وناس قريبة مني جدًا، وأعتبرهم إخواتي، فمستحيل أكون أقصد أقلل منهم أو من تعبهم، وأنا أصلًا مقدرش أغلط فيهم. وعشان كده، أنا بوضح للمرة التانية: كلامي كله موجه للجهات الوزارية والمسؤولة عن وضع وقواعد قبول الطلاب المصريين القادمين من الخارج. أنا مش بطالب طالب مصري يتسحب منه حقه علشان أنا أخد مكانه، ومش بطالب بمقارنة بيني وبين طالب في الثانوية المصرية. أنا بطالب الوزارة إنها تضع لنا إحنا نظام واضح وعادل، وتوفر لنا أماكن تتناسب مع مجاميعنا وشهاداتنا، بدل ما نفضل في حالة انتظار ومصيرنا مجهول. وده دور الجهات المسؤولة، مش دور الطلاب. الطالب المصري مش هو اللي حط قواعد التنسيق، ومش هو اللي حدد أعداد الأماكن، ومش هو اللي مسؤول عن معادلات الشهادات أو سياسات القبول. فلو في مشكلة في النظام، الحل لازم ييجي من الجهة اللي بتحط النظام. أناشد وزارة التعليم العالي والمسؤولين إنهم يسمعوا صوتنا، ويفهموا إن فيه طلاب مصريين رجعوا من الخارج علشان يدرسوا في بلدهم، وحققوا مجاميع عالية، ومع ذلك مش لاقيين مسار واضح وعادل يكملوا من خلاله تعليمهم. إحنا مش بنطلب حق على حساب حد، ومش بنهاجم حد، ومش بنقول إننا أحسن من أي طالب. إحنا بنطالب بحقنا إحنا. سبق ووضحت إن الفيديو ده مش عن الثانوية المصرية، ومش ضد طلاب مصر. الفيديو عن مشكلة إحنا بنواجهها، وعن مطلب أنا بوجهه بشكل مباشر للجهات الوزارية المسؤولة: اعملوا لنا مكان عادل وواضح في بلدنا، من غير ما يكون حقنا على حساب حق أي طالب تاني. لأن في النهاية، إحنا كلنا ولاد بلد واحدة، وكلنا تعبنا، وربنا شاهد على تعب كل واحد فينا. فبدل ما نختلف مع بعض، خلونا نوجّه الكلام للجهة اللي تقدر فعلًا تحل المشكلة. - @user1391740115733