ئەو کاتەی بە قەبارەیەکی بچووک و خەونێکی گەورە دەستی بە ڕێگاکەی کرد کەم کەس دەیزانی کە ئەو ڕێگایە چەند قورس دەبێت مێسی تەنیا لەگەڵ یاریزانانی بەرامبەر نەدەجەنگا لەگەڵ چاوەڕوانییەکی تەواوی نەتەوەیەکیش جەنگی هەر هەڵەیەک دەکرایە بارێک لەسەر شانی، هەر شکستێک دەبووە پرسیارێکی نوێ، و هەر کاسێکی لەدەستچوو دەبووە هۆی ئەوەی خەڵک زیاتر لەوەی کە یارییەکە ببینن، چاو لەو بکەن و بپرسن: «کەی مێسی ئەرجەنتین دەگەیەنێتە ئەو شوێنەی کە ساڵانە چاوەڕێی دەکەین؟» بەڵام مێسی بە پێچەوانەی زۆرێک لە ئەفسانەکان، بە ڕێگایەکی بێکێشە نەگەیشتە لووتکە؛ ئەو لە ڕێگادا شکستی زۆری بینی، هەستی بە فشار کرد، لە کاتی هەڵە و شکستدا تەنیا مایەوە و هەموو جارێک دووبارە دەگەڕایەوە بۆ ئەوەی جارێکی تر هەوڵ بدات. لەوانەیە ئەمە گەورەترین بەشی چیرۆکەکەی بێت؛ چونکە گەورەیی مێسی تەنیا لەوەدا نییە کە چۆن گۆڵی دەکرد ، پاسەکانی چۆن بوون یان چەند جامی بردەوە، بەڵکوو لەوەدایە کە چۆن لە دوای هەر شکستێک هێشتا هەستی بەوە دەکرد کە شتێک ماوە بۆ تەواوکردن. ئەو کاتەی لە کۆتایی جامی جیهانی ٢٠٢٢ جامەکەی بەرز کردەوە، لە ڕاستیدا کۆتایی چیرۆکێکی ساڵانەی نووسی. ئەو ساتە تەنیا ساتی بردنەوەی جامی جیهانی نەبوو؛ ساتی گەڕانەوەی هەموو ئەو خەونانە بوو کە لە ساڵانی پێشوو لەگەڵ شکستەکاندا ون ببوون. وەک ئەوەی مێسی لەو ساتەدا نەک تەنیا جامێکی زێڕین، بەڵکوو وەڵامی هەموو ئەو پرسیارانەی دابێتەوە کە ساڵانێک بەدوایدا هاتبوون. ئەرجەنتین لەگەڵ مێسی بردییەوە، بەڵام مێسیش لەگەڵ ئەرجەنتین بەشێک لە خۆی دۆزییەوە. بۆیە ئەگەر ڕۆژێک بڕیار بدرێت کە ئەو یارییەکانی لەگەڵ تیمی نیشتیمانی کۆتایی پێبهێنێت، ئەوە تەنیا کۆتایی کارێکی وەرزشی نییە؛ کۆتایی قۆناغێکە کە تێیدا یاریزانێک لە منداڵێکی خەون‌بین بووە بە پیاوێکی مێژوویی، و ناوی خۆی لەگەڵ ناوی ئەرجەنتین و تۆپی پێدا بە یەکەوە گرێداوە. یاریگاکان دوای مێسیش پڕ دەبنەوە، یارییەکان بەردەوام دەبن، گۆڵەکان تۆمار دەکرێن و یاریزانە نوێکان دێن؛ بەڵام ئەو هەستەی کە مێسی لە دڵی خەڵکدا دروستی کردووە بە ئاسانی دووبارە نابێتەوە. چونکە هەندێک یاریزان تەنیا یاری تۆپی پێ دەکەن، بەڵام هەندێکی تر تۆپی پێ دەکەن بە بیرەوەرییەکی ژیان. مێسی لە جیهانی تۆپی پێدا بە ژمارە و ئامار ناسراوە، بەڵام لە دڵی خەڵکدا بە شتێکی زۆر گەورەتر ناسراوە: بەو شەوانەی کە خەڵک لەگەڵ گۆڵەکانی خۆشحاڵ دەبوون، بەو ساتانەی کە لەگەڵ شکستەکانی بێدەنگ دەبوون، بەو چاوەڕوانییە درێژەی کە کۆتاییەکەی بوو بە جامی جیهانی بۆیە ئەگەر ئەم ڕێگایە بە کۆتایی بێت، نابێت بە تەنیا بە «خواحافیزی»یەکی یاریزان سەیری بکەین؛ دەبێت وەک کۆتایی کتێبێک سەیری بکەین کە زۆرێک لە لاپەڕەکانی بە خەون، شکست، فرمێسک، هیوای دووبارە و سەرکەوتن نووسراوە. مێسی لە تۆپی پێ دەڕوات، بەڵام ئەو چیرۆکەی لەگەڵ ئەرجەنتین نووسیویەتی لەگەڵی ناڕوات. ئەو چیرۆکە دەمێنێتەوە؛ لە وێنەی ئەو جامەیە کە لەسەر سەری بەرزیکردەوە، لە هاواری خەڵک لە شەوی فینال، لە چاوەڕوانییەکانی ساڵانی پێشوو، و لە دڵی ئەو جیلەی کە مێسی بۆیان تەنیا یاریزانێکی دڵخواز نەبوو، بەڵکوو هاوڕێیەکی بێدەنگی ژیانیان بوو. ئەرجەنتین دوای مێسی یاری دەکات و ئەکرێ چەندین نازناوی تریش ببینێت، بەڵام ئەو قۆناغەی کە مێسی لەسەر یاریگاکانی ئەرجەنتین نووسی، تەنیا جارێک لە مێژوودا ڕوودەدات. چونکە ئەفسانەکان هەرگیز بە تەواوی کۆتاییان نایەت تەنیا ڕۆژێک دەست لە یاریکردن هەڵدەگرن و دەبنە بیرەوەرییەکی هەمیشەیی. و کاتێک دوایین جار مێسی یاریگاکانی ئەرجەنتین جێدەهێڵێت، شاید زۆر کەس تەنیا یاریزانێک ببینن کە دەڕوات؛ بەڵام ئەوانەی لە چیرۆکەکەدا لەگەڵی ژیاون ، دەزانن کە لەو ساتەدا شتێکی زۆر گەورەتر لە یاریزانێک دەڕوات: کە بەشێکە لە جوانترین یادەوەرییەکانی ژیانمان - @mhamadshexxalid