@ko.zin.gyi993: ဒီသတင်းကို စားတော်ပဲနဲ့ ပဲရာဇာတွေ အိန္ဒိယဘက်ကို အဓိက တင်ပို့နေတဲ့ ကမ္ဘာ့ထိပ်တန်း ပဲတင်ပို့သူ ကနေဒါနိုင်ငံရဲ့ သတင်းမီဒီယာတစ်ခုက တင်ဆက်တာ ဖြစ်ပြီး မြန်မာပြည်က ပဲလောကသားတွေ သိရအောင်လို့ ကျနော်တို့ ကနေ ဘာသာပြန် တင်ပြလိုက်ပါတယ်။ ကနေဒါနိုင်ငံရဲ့ ပဲတင်ပို့ရာ အဓိကဈေးကွက်ကြီး ဖြစ်တဲ့ အိန္ဒိယနိုင်ငံဆီကို စားတော်ပဲနဲ့ ပဲရာဇာတွေ တင်ပို့နိုင်မယ့် အလားအလာတွေဟာ အလွန် ကောင်းမွန်လာနေတယ်လို့ ဈေးကွက် လေ့လာသုံးသပ်သူတစ်ဦးက ပြောပါတယ်။ အိန္ဒိယနိုင်ငံရဲ့ အနောက်တောင်မုတ်သုံမိုးက မျှော်လင့်ထားတာထက် အများကြီးကို အားနည်းခဲ့တာကြောင့် ဒါဟာ ကနေဒါနိုင်ငံအတွက် အခွင့်အလမ်းကောင်းတစ်ရပ်ကို ဖန်တီးပေးလာတယ်လို့ ဆိုပါတယ်။ "အိန္ဒိယမှာ မုတ်သုံမိုးက ဇွန်၊ ဇူလိုင်နဲ့ သြဂုတ်လတွေတစ်လျှောက်လုံး အားနည်းခဲ့ပြီး စက်တင်ဘာလမှာလည်း ဘာမှ ထူးခြားလာမှာ မဟုတ်ပါဘူး" လို့ AgPulse Analytica က သုံးသပ်သူ Gaurav Jain က ပြောဆိုပါတယ်။ အိန္ဒိယမိုးလေဝသနဲ့ ဇလဗေဒဌာန (IMD) ရဲ့ အဆိုအရ ဒီနှစ် ဇွန်လ ၁ ရက်နေ့ကနေ သြဂုတ်လ ၃၁ ရက်နေ့အထိ တစ်နိုင်ငံလုံးရဲ့ စုစုပေါင်းမိုးရေချိန်ဟာ ၆၀၃.၇ မီလီမီတာ ရှိပြီး ပုံမှန်မိုးရေချိန်ထက် ၁၃.၈ ရာခိုင်နှုန်း လျော့နည်းခဲ့ပါတယ်။ စက်တင်ဘာလအတွက် မိုးလေဝသခန့်မှန်းချက်ကလည်း အခြေအနေ မကောင်းဘဲ ဖြစ်နေပါတယ်။ ကာလရှည် (၁၉၇၁ ခုနှစ်မှ ၂၀၂၀ ခုနှစ်အထိ) ပျမ်းမျှမိုးရေချိန် ၁၆၇.၉ မီလီမီတာရဲ့ ၉၁ ရာခိုင်နှုန်းအောက်သာ မိုးရွာသွန်းနိုင်မယ်လို့ IMD ဌာနက ခန့်မှန်းထားပါတယ်။ အိန္ဒိယနိုင်ငံရဲ့ ပဲမျိုးစုံ တင်သွင်းမှုအခြေအနေက ကနေဒါပဲဈေးကွက်ရဲ့ အတက်အကျ လည်ပတ်မှုကို ပုံဖော်ပေးနေပါတယ်။ အိန္ဒိယနိုင်ငံမှာ မိုးသီးနှံတွေကို စိုက်ပျိုးနေကြပြီး၊ စက်တင်ဘာနဲ့ အောက်တိုဘာလတွေမှာ ရိတ်သိမ်းကြမှာ ဖြစ်ပါတယ်။ ပဲတွေ စိုက်ပျိုးချိန်တုန်းက မြေဆီလွှာထဲမှာ အစိုဓာတ်ကောင်းကောင်း ရခဲ့လို့ မိုးစိုက်သီးနှံတွေက အခုချိန်အထိတော့ အခြေအနေကောင်းနေဆဲပါပဲ။ ဒါပေမဲ့ လုံလောက်တဲ့ မိုးရေချိန် မရတာကတော့ ရိတ်သိမ်းချိန် ရောက်လာရင် ရလဒ်ပေါ်မှာ သက်ရောက်မှု ရှိလာမှာပါ လို့ Gaurav Jain က ပြောပါတယ်။ ကနေဒါတောင်သူတွေရဲ့ ရှုထောင့်ကနေ ကြည့်မယ်ဆိုရင် မိုးစိုက်သီးနှံတွေထဲမှာ ပဲစဉ်းငုံက အရေးအပါဆုံး ဖြစ်ပါတယ်။ ဘာလို့လဲဆိုတော့ မိုးရာသီမှာ ပဲစဉ်းငုံသာ အထွက်နည်းခဲ့ရင် အိန္ဒိယက ကနေဒါက ပဲရာဇာတွေကို အစားထိုးအနေနဲ့ စားသုံးကြလို့ပဲ ဖြစ်ပါတယ်။ ဩဂုတ်လ ၂၈ ရက်နေ့အထိ စာရင်းတွေအရ အိန္ဒိယတောင်သူတွေဟာ ပဲစဉ်းငုံဧက ၁၁ သန်းအထိ စိုက်ပျိုးပြီးစီးခဲ့ကြပြီး ဒါဟာ မနှစ်ကနဲ့ တန်းတူလောက် ရှိနေပေမဲ့ နောက်ဆုံး စိုက်ပျိုးပြီးစီးတဲ့ပမာဏက မနှစ်ကထက် လျော့နည်းသွားနိုင်တယ်လို့ Gaurav Jain က ခန့်မှန်းထားပါတယ်။ အိန္ဒိယအစိုးရက ဒီနှစ် ပဲစဉ်းငုံ အထွက်နှုန်း လျာထားချက်ကို တန်ချိန် ၄ ဒသမ ၀၂ သန်းအထိ သတ်မှတ်ထားပါတယ်။ မနှစ်က တရားဝင် ထွက်ခဲ့တဲ့ ပမာဏကတော့ တန်ချိန် ၃ ဒသမ ၅၉ သန်း ရှိခဲ့ပါတယ်။ ဒါပေမဲ့ AgPulse Analytica ကုမ္ပဏီကတော့ ဒီထက်ပိုပြီး စိုးရိမ်စရာရှိတယ်လို့ ယူဆပြီး ကျွန်တော်တို့ရဲ့ ခန့်မှန်းချက်ကတော့ မနှစ်က ရာသီက တန်ချိန် ၃ ဒသမ ၈၂ သန်း ရှိခဲ့ရာကနေ၊ ဒီတစ်ခါမှာတော့ တန်ချိန် ၃ ဒသမ ၂ သန်းပဲ ထွက်လာဖို့ ရှိပါတယ် လို့ ဆိုပါတယ်။ အိန္ဒိယနိုင်ငံဟာ ဒီနှစ် ပထမနှစ်ဝက်အတွင်းမှာ ပဲစဉ်းငုံတွေကို စံချိန်တင် ပမာဏအထိ တင်သွင်းခဲ့ပါတယ်။ လက်ကျန်ပဲတွေကတော့ အတော်များပါတယ်။ ဒါပေမဲ့ တန်ချိန် ၆၀၀,၀၀၀ လောက် အထွက် လျော့သွားကိုတော့ ပြည်တွင်းလက်ကျန်နဲ့ပဲဖြစ်ဖြစ်၊ ပြည်ပက တင်သွင်းတာနဲ့ပဲဖြစ်ဖြစ် ဖြည့်ဆည်းဖို့ဆိုတာ အတော်လေး ခက်ခဲပါလိမ့်မယ် လို့ Jain က ရှင်းပြပါတယ်။ AgPulse ကုမ္ပဏီရဲ့ ခန့်မှန်းချက်အရဆိုရင် ၂၀၂၆-၂၇ (ဧပြီ - မေ) ဘဏ္ဍာနှစ်အတွင်း ပဲရာဇာ တင်သွင်းမှုက တန်ချိန် ၁ ဒသမ ၆ သန်း ကျော်လွန်သွားဖို့ ရှိနေပါတယ်။ ၂၀၂၃-၂၄ ခုနှစ်မှာ တန်ချိန် ၁ ဒသမ ၆၈ သန်းအထိ တင်သွင်းခဲ့ဖူးပါတယ်။ မုတ်သုံအားနည်းတာကြောင့် အိန္ဒိယက ဆည်တွေထဲက ရေပမာဏတွေ ပုံမှန်ထက် လျော့ကျသွားနိုင်ပြီး ဆောင်းသီးနှံစိုက်ပျိုးထုတ်လုပ်မှုကိုပါ ထိခိုက်လာစေနိုင်ပါတယ်။ မြေဆီလွှာ အစိုဓာတ် အခြေအနေတွေကလည်း ပုံမှန်ထက် ပိုဆိုးလာဖို့ ရှိနေပါတယ်။ တကယ်လို့ အိန္ဒိယနိုင်ငံအနေနဲ့ လုံလောက်တဲ့ ဆောင်းမိုးမရဘူးဆိုရင် ဆောင်းသီးနှံ စိုက်ဧကတွေနဲ့ အထွက်နှုန်းတွေပါ ထိခိုက်နစ်နာရပါလိမ့်မယ် လို့ Jain က ဆိုပါတယ်။ ကုလားပဲဟာ အိန္ဒိယရဲ့ အဓိကအကျဆုံး ဆောင်းရာသီစိုက် ပဲအမျိုးအစား ဖြစ်ပါတယ်။ အိန္ဒိယမှာ ဒေသထွက် ကုလားပဲတွေက ပြတ်လပ်နေပြီး ဩစတြေးလျဘက်မှာလည်း အထွက်နည်းတာကြောင့် အိန္ဒိယဘက်က လိုအပ်ချက်ကို ဖြည့်ဆည်းဖို့အတွက်ဆိုရင် ကနေဒါရဲ့စားတော်ပဲကို မဖြစ်မနေ တင်သွင်းဖို့ ဖြစ်လာမယ်လို့ သုံးသပ်ပါတယ်။ (ကနေဒါအကြောင်း ပြောတာ ဆိုပေမဲ့ သေချာ ဖတ်ကြည့်မယ် ဆိုရင် အိန္ဒိယရဲ့ ပဲလိုအပ်ချက်ကို တွေ့ရမှာ ဖြစ်ပါတယ်)

တောင်သူကြီး(Official)

Open In TikTok:

Region: MM

Wednesday 02 September 2026 13:27:17 GMT