رابطوں میں رہا کرو، لوگ اچانک مر جاتے ہیں رابطوں میں رہا کرو کیونکہ زندگی کسی کو آخری ملاقات کا وقت نہیں دیتی۔ کبھی کبھی ہم یہ سوچ کر کسی سے بات نہیں کرتے کہ کل کر لیں گے، وقت ملا تو مل لیں گے، ناراضگی ختم ہو جائے گی مگر بعض اوقات وہ کل کبھی نہیں آتا۔ کچھ لوگ اچانک خاموش ہو جاتے ہیں اور پھر اُن کی خاموشی ہمیشہ کے لیے بن جاتی ہے۔ فون میں اُن کا نمبر موجود رہتا ہے چیٹ میں آخری پیغام موجود رہتا ہے تصویروں میں اُن کا چہرہ مسکراتا رہتا ہے مگر انسان خود کہیں بہت دور جا چکا ہوتا ہے۔ پھر دل کے اندر ایک عجیب سا سوال جنم لیتا ہے کاش اُس دن بات کر لی ہوتی کاش ناراضی ختم کر دی ہوتی کاش آخری بار گلے لگا لیا ہوتا کاش ایک بار کہہ دیا ہوتا کہ تم بہت عزیز ہو۔ ہم اکثر اپنے پیاروں کو معمول سمجھ کر نظرانداز کر دیتے ہیں۔ ہمیں لگتا ہے کہ یہ شخص تو ہمیشہ رہے گا مگر حقیقت یہ ہے کہ زندگی میں کوئی بھی ملاقات آخری ملاقات ہو سکتی ہے۔ اس لیے اگر کوئی اپنا ہے تو رابطے میں رہا کرو۔ کبھی بلاوجہ خیریت پوچھ لیا کرو کبھی بغیر کسی مطلب کے پیغام بھیج دیا کرو کبھی صرف اتنا کہہ دیا کرو "تم یاد آئے، اس لیے سوچا بات کر لوں۔" کیونکہ کچھ معذرتیں قبر تک پہنچ جاتی ہیں کچھ محبتیں دل میں دفن ہو جاتی ہیں اور کچھ باتیں زبان تک آتے آتے ہمیشہ کے لیے خاموش ہو جاتی ہیں۔ لوگ صرف مر نہیں جاتے کبھی کبھی اُن کے جانے کے بعد ہماری زندگی کا ایک حصہ بھی اُن کے ساتھ دفن ہو جاتا ہے۔ اس لیے وقت رہتے محبت کر لیا کرو وقت رہتے معاف کر دیا کرو وقت رہتے گلے لگا لیا کرو اور وقت رہتے رابطے میں رہا کرو کیونکہ لوگ واقعی اچانک مر جاتے ہیں اور پھر ہمارے پاس صرف یادیں، تصویریں اور "کاش" رہ جاتے ہیں۔ - @mayoos_zindgi