في لحظة كدا، الواحد محتاج يقعد براهو… بعيد من دوشة الناس، بعيد من الموبايل، بعيد من الكلام الكتير والأسئلة البتجي من نوع: مالك؟ حصل شنو؟ إنت متغير ليه؟ يقعد ويفتش جوّه روحو. يفتكر الناس المَرّوا في حياتو، الوجوه البقت جزء من يومو، الأصوات الكان متعوّد يسمعها، الضحكات الكانت بتملأ المكان، والرسائل الكانت بتجي من غير مناسبة، بس عشان زول قال: "قلت أطمّن عليك." وفي الوقفة دي… ما داير ألوم زول، وما داير أعاتب زول، وما داير أرجّع شريط الحاصل عشان أعرف منو الغلطان ومنو المظلوم. داير أقول بس: شكراً. لكل زول دخل حياتي وخلّى فيها أثر، حتى لو الأثر كان وجع. شكراً للناس البعرفوني وأنا في أحسن حالاتي، والناس البعرفوني وأنا تعبان وما عندي كلام، وما قادر أشرح الحاصل جواي. شكراً للزول الكان يسألني: "أكلت؟" وما كان عارف إن السؤال البسيط دا مرات كان بالنسبة لي أكبر من كلام كتير. شكراً للزول الكان يقول: "أنا معاك." حتى لو ما قدر يعمل حاجة، مجرد وجودو كان كفاية. شكراً للصحبة الحلوة… للضحكة البتطلع من القلب، للقعدات البسيطة، للشاي البنعملو من غير مناسبة، للكلام البمتد بالساعات، للذكريات البتخلينا نضحك كل ما نفتكرها. شكراً للشارع العرف خطواتنا، للبيت البشهد تفاصيلنا، للمكان الكنا بنرجع ليهو مهما طال الغياب. شكراً للأيام البسيطة… شكراً لأمي… لو في زول في الدنيا يستحق كلمة "شكراً" ألف مرة، فهي أمي. شكراً ليها على الدعوات البتطلع منها من غير ما أعرف، على خوفها البتخبيه في سؤال بسيط، على صوتها البتتغير نبرتو لما أتأخر، وعلى قلبها البعرف إني تعبان حتى لو قلت ليها: "أنا كويس." شكراً لأبوي للصمت البفهمو بعد ما كبرت، للكلام القليل الكان وراه خوف كبير ومحبة أكبر، للنصيحة البكانت زمان تقيلة عليّ وبقيت هسع أفهم قيمتها. شكراً للأهل للناس البتختلف معاهم لكن مستحيل تتخلى عنهم، للبيت البتلقى نفسو مفتوح ليك حتى لو الدنيا كلها قفلت أبوابها، للزول البقول ليك: "تعال بس… بعدين بنتفاهم." شكراً لكل صاحب كان موجود في الزمن الصعب شكراً للناس البعرفوا قيمة السكوت. وشكراً للناس البخلّوني أضحك في وقت كنت فاكر إني نسيت الضحك. لكن… شكراً برضو للناس الخذلتني. أيوة… شكراً. ما لأنو الخذلان كان ساهل، لكن لأنو بعض الدروس ما بتتعلمها بالكلام. بتتعلمها لما تثق في زول، وبعد داك تلقى نفسك واقف براك قدام حقيقة ما كنت داير تصدقها. بتتعلم إنو ما كل كلمة حلوة معناها نية حلوة. وما كل زول قال "أنا معاك" حيكون معاك لما تحتاجو. وما كل علاقة بتبدأ جميلة لازم تستمر للنهاية. في ناس كانوا فصل جميل… لكن ما كانوا الكتاب كلو. وفي ناس كنا متأكدين إنهم حيبقوا العمر كلو، لكن الأيام قالت لينا: "ديل كانوا محطة، ما نهاية الطريق." وشكراً لكل شخص علّمني إنو المحبة ما معناها أتنازل عن كرامتي. وإنو الوفاء ما معناهو أتمسك بزول ما داير يتمسك بي. وإنو الاعتذار ما لازم يكون آخر حاجة في كل خلاف، لأنو مرات في حاجات بتنكسر وما بترجع زي الأول. وشكراً لكل باب اتقفل في وشي. زمان كنت بزعل من الأبواب المقفولة. كنت بسأل: "ليه؟ أنا عملت شنو؟ ليه الطريق دا انتهى؟ ليه الحاجة البتمناها ما حصلت؟" لكن بعد الزمن مرّ، فهمت. فهمت إنو مرات الباب البتقفل في وشي، بيكون ربنا قافلو عشان يحميني من حاجة أنا ما شايفها. وفهمت إنو التأخير ما دايماً حرمان. مرات التأخير ترتيب. ومرات المنع بيكون رحمة. ومرات الخسارة بتكون بداية لحاجة أكبر. شكراً للأحلام الما اكتملت. شكراً للأمنيات البانت بعيدة. لأنها علّمتني أكون صبور. علّمتني إنو الحياة ما بتمشي كلها على مزاجنا. في يوم بنكون فرحانين، وفي يوم تاني بنصحى من النوم وما عندنا طاقة حتى نشرح لزول نحن مالنا. وفي يوم بنحس إنو الدنيا كلها فاتحة لينا أبوابها، وفي يوم بنحس إنو كل الأبواب اتقفلت مرة واحدة. لكن في الحالتين… الحياة ماشّة. والزمن ما بوقف عشان زول. وعشان كدا، شكراً لكل صباح صحيت فيهو وأنا مكسور، وبرضو قمت. شكراً لكل يوم كنت تعبان فيهو لكن كملت. شكراً لكل مرة بكيت فيها بعيد من الناس ومسحت دمعتك وقلت: "بكرة أحسن." حتى لو ما كنت مصدقها وقتها. شكراً لكل مرة وقعت وقمت. لكل مرة اتوجعت وبرضو اخترت تكون طيب. ودي يمكن أكبر حاجة اتعلمتها: إنو الدنيا ممكن تغيّر قلب الزول، لكن ما مفروض تخليه يفقد إنسانيتو. ما كل من وجعك لازم توجعو. ما كل من ظلمك لازم تظلمو. وما كل من مشى لازم تكرهوا. في ناس بنودعهم بالدعاء بدل الغضب. وبنمشي. ما لأنو ما فارق معانا. لكن لأنو بقينا فاهمين إنو بعض الناس مكانهم في الذكرى، ما في الحاضر. وفي آخر الوقفة… ما عندي كلام كتير. بس عندي دعوة: يا رب، عوّض كل قلب تعب. يا رب، احفظ لينا أهلنا، وأصحابنا، والناس البنعزهم. يا رب، اجبر خاطر كل زول بضحك قدام الناس وهو مكسور من جوّا. ويا رب، ما تجعلنا سبب في وجع زول. مقــ⁷ــداد #جخو،الشغل،دا،يا،عالم،➕_❤_📝 #خواطر_مقداد - @megdadahmed22