مير مرتضىٰ ڀٽو شھيد کي ڀيٽا.! 20 سيپٽمبر جو ڏينهن پاڪستان جي سياسي تاريخ ۾ رت سان لکيل هڪ باب وانگر آهي۔ اهو ڏينهن جڏهن سنڌ ڌرتيءَ جي سينو چيري، عوامي خوابن جي معمار ۽ انقلاب جي سالار شھيد مير مرتضىٰ ڀٽو ۽ سندس ساٿين کي گولين سان پروڻ ڪري نشانو بڻايو ويو۔ مون درد ابتو به لکيو، مون درد سبتو به لکيو، پر اهو درد ئي رهيو ــ ڇو ته اهو درد صرف ذاتي نقصان جو نه هو، پر اها حڪومتي ۽ رياستي جبر سان حقيقي جمھوري راهه تان گمراهي ڏانهن ڌڪجڻ واري پاليسين جو تسلسل هو، جنهن جو شڪار هميشه عوام دوست رهنما ٿيا آهن۔ مير جو قتل دراصل عوام جي اميدن، امنگن ۽ خوابن جو قتل هو۔ هو پنهنجي والد قائد عوام ذوالفقار علي ڀٽو جي مشن کي اڳتي وڌائڻ لاءِ بي دريا دل سان وڙهندڙ سپاهي هو۔ سندس اکين ۾ روشنين جو خواب هو: هڪ اهڙي پاڪستان جو خواب جتي محنت ڪش کي عزت هجي، زمين ان جي هجي جيڪو ان کي کيڙي سگھي، تعليم ۽ علاج هر شهري جو حق هجي، ۽ وفاقي وحدت ان بنياد تي هجي جتي سنڌ، بلوچستان، پنجاب ۽ سرحد پنهنجو پاڻ کي برابر شريڪ سمجهن۔ پر، افسوس! استحصالي قوتن کي اهو خواب برداشت نه ٿيو۔ جيئن اڳ ذوالفقار علي ڀٽو کي تختي دار تي چاڙهيو ويو، جيئن شاھنواز ڀٽو کي زهر جو پيالو پياريو ويو، تيئن ئي مير مرتضىٰ ڀٽو کي سرعام گولين سان ڇلني، اقتدار جي غلامن ۽ سازشن جي سوداگرن ثابت ڪيو ته هن ملڪ ۾ عوام دوست آواز کڻڻ سڀ کان وڏو جرم آهي۔ مير مرتضىٰ ڀٽو رڳو هڪ فرد نه هو، هو هڪ فڪر، هڪ سوچ ۽ هڪ مزاحمت جو نالو هو۔ هو پنهنجي ڌرتيءَ جي سورن کي پنهنجو سور سمجهندو هو، ۽ انهن جي آزادي لاءِ هر قرباني ڏيڻ لاءِ تيار هو۔ سندس شهادت اسان کي اهو پيغام ڏئي ٿي ته: جدوجهد جو رستو ڪڏهن به آسان ناهي، پر اهو ئي رستو قومن کي حقيقي آزادي ڏي ٿو۔ اڄ، جڏهن ملڪ وري هڪ ڀيرو نجيڪاري، استحصال ۽ ڌرتيءَ جي وسيلن جي لوٽ مار جي پاليسين ۾ ڦاٿل آهي، ته مير جو خواب ۽ مير جو فڪر وڌيڪ اهم ٿي ويو آهي۔ ان وقت جو سوال آهي ته ڇا اسين مير جي شهادت کي رڳو رواجي ورسي تائين محدود رکون يا سندس فڪر کي نئين سياسي راهه ۾ بدلائي، عوام کي گڏ ڪري حقيقي انقلاب ڏانهن وٺي وڃون؟ مير جي ورسي تي اسان کي اهو عزم ڪرڻو پوندو ته: ظلم خلاف آواز بلند ڪنداسين، سازشن ۽ موقع پرستن جي سياست کي رد ڪنداسين، ۽ پنهنجي ايندڙ نسل لاءِ هڪ اهڙو ملڪ جوڙي ڇڏينداسين، جيڪو مير مرتضىٰ ڀٽو جو خواب هو۔ 🌹 سلام ميرِ انقلاب تي، جنهن جو نالو تاريخ جي سونهن ۾ امر آهي۔ 🌹 سلام انهن سڀني وفادارن تي، جيڪي اڄ به سندس فڪر ۽ شهادت کي پنهنجو رستو سمجهن ٿا۔ #TikTokCreatorSearchInsightsIncentive #creatorsearchinsights #YasirBasheerShaikh #20septemberblackday #ShaheedMeerMurtazaBhutto - @fakeeryasirsain110