ایک اچانک حادثے میں میری وفات کو تقریباً پانچ سال گزر چکے تھے۔ اپنی زندگی میں، میں اکثر سوچا کرتا تھا کہ میرے بعد میرے بچوں اور میری بیوی کی زندگی شاید رک سی جائے گی۔ یہ خیال ہی مجھے اندر تک ہلا دیتا تھا کہ میرے بعد گھر میں کمانے والا کوئی نہیں ہوگا تو میری بیوی بچوں کو کہاں سے کھلائے گی؟ میرے بغیر میرے بچے کیسے رہیں گے؟ میری ماں کیسے رہے گی؟ مجھے لگتا تھا، شاید میرے جانے کے بعد یہ گھر ویسا گھر نہیں رہے گا۔ لیکن خیر... یہ تو صرف خیال تھے۔ ایک دن اچانک موت آئی اور میں دنیا سے چلا گیا۔ تقریباً پانچ سال بعد نہ جانے کیوں دل میں خیال آیا کہ کیوں نہ ایک بار پیچھے مڑ کر اپنے گھر والوں کو دیکھ لیا جائے۔ میں اپنی قبر سے اٹھا اور اپنے گھر جا پہنچا۔ گھر پہنچا تو اندر سے قہقہوں اور باتوں کی آوازیں آ رہی تھیں۔ دروازے سے اندر داخل ہوا تو ایک عجیب سا منظر میرے سامنے تھا، گھر میں جیسے جشن کا سماں تھا مہمان بیٹھے تھے، چہروں پر مسکراہٹیں تھیں، بچے جوان ہو چکے تھے اور خوشی خوشی ادھر اُدھر پھر رہے تھے۔ پھر میری نظر ایک صوفے پر بیٹھی ایک لڑکی پر پڑی۔ وہ میری بیٹی تھی وہی بیٹی جو میری وفات کے وقت سترہ سال کی تھی، آج وہ بڑی ہو چکی تھی، سجی سنوری بیٹھی تھی۔ اس کے ایک طرف اس کی دادی بیٹھی تھیں اور دوسری طرف میری بیوی کچھ فاصلے پر کھڑی اپنی بیٹی کو دیکھ کر مسکرا رہی تھی۔ شاید آج میری بیٹی کی منگنی یا شادی تھی، میں کچھ دیر وہیں کھڑا سب کو دیکھتا رہا۔ سب خوش تھے، بہت خوش۔۔۔! کسی کے چہرے پر یہ سوال نہیں تھا کہ وہ شخص کہاں ہے جس کے بغیر کبھی زندگی ادھوری لگتی تھی۔ مجھے چند لمحوں میں احساس ہو گیا کہ جس زندگی کو میں اپنے بغیر رُک جانے والی سمجھتا تھا، وہ میرے بغیر بھی چلتی رہی تھی۔ بلکہ پوری آب و تاب سے چل رہی تھی۔ صرف میں ہی یہ سمجھتا رہا تھا کہ میرے بغیر سب کچھ رک جائے گا، میرے اہم ہونے کے سارے وہم ایک ہی لمحے میں ختم ہو گئے۔ میں خاموشی سے واپس پلٹ آیا، اپنی قبر میں اترا، دل میں ایک چھبن سی ہوئی اور حسرت پیدا ہوئی کہ کاش میں اپنی زندگی میں اپنے لیے بھی نیک اعمال کی شکل میں کچھ ساتھ لے آتا۔۔ پھر لیٹا اور آنکھیں بند کر کے دوبارہ ابدی نیند سو گیا۔ فکرِ آخرت کے لیے اک پیغام ابھی وقت ہے میرے دوست آج کی نیکی کو کل پے مت ڈالیں ابھی کر گزریں۔۔ تحریر اچھی لگے تو شیئر لازمی کر دیں۔۔ #foryou #fyp #foryoupage #pakistan #india - @myhealth180