@azpolitika: İqtisadçı Elnur Quliyev “AzPolitika”ya bildirib ki, onlayn alış-verişin genişlənməsi, şübhəsiz ki, istehlakçı davranışını dəyişdirir və bu proses gələcəkdə ənənəvi pərakəndə ticarətə ciddi təsir göstərəcək: “Daha real ssenari fiziki mağazaların sayının müəyyən seqmentlərdə azalması və onların fəaliyyət modelinin dəyişməsidir. Çünki bəzi məhsullarda istehlakçı hələ də məhsulu canlı görmək, yoxlamaq, ölçüsünü və keyfiyyətini qiymətləndirmək və dərhal əldə etmək istəyir. Ənənəvi mağazaların əsas çıxış yolu onlayn satışla rəqabət aparmaq deyil, onlayn və fiziki satışı birləşdirən omnikanal modelə keçməkdir. Yəni müştəri məhsulu internetdə seçə, qiymətini və mağazada mövcudluğunu görə, onlayn sifariş verib mağazadan götürə və ya evə çatdırılmasını seçə bilməlidir. Məsələn, geyim mağazası yalnız fiziki satışla kifayətlənmək əvəzinə məhsullarını Instagram və öz onlayn platformasında nümayiş etdirə bilər. Müştəri ölçünü və məhsulu internetdən seçir, mağazaya gəlib geyinir və bəyəndiyi halda alır. Elektronika mağazasında isə müştəri məhsulu onlayn sifariş edib mağazadan götürə, yaxud mağazada məhsula baxdıqdan sonra sifarişi onlayn rəsmiləşdirə bilər. Burada fiziki mağazanın rolu da dəyişir. Mağaza sadəcə məhsul satılan yer deyil, eyni zamanda məhsulun sınaqdan keçirildiyi, məsləhət alındığı, sifarişin götürüldüyü və qaytarıldığı məntəqəyə çevrilir. Ənənəvi mağazalar müştəriyə onlayn platformaların hər zaman verə bilmədiyi üstünlükləri – peşəkar məsləhət, məhsula yerində baxış, sürətli servis, zəmanət və daha rahat qaytarma imkanlarını təqdim etməlidir. Yəni gələcəyin əsas modeli “onlayn mağaza və ya fiziki mağaza” deyil, onlayn + fiziki mağaza modelidir. Bu transformasiyaya uyğunlaşa bilməyən mağazaların bazardan çıxması mümkündür”.

azpolitika

Open In TikTok:

Region: AZ

Thursday 03 September 2026 07:02:04 GMT