@serhed.az: Son günlər sosial şəbəkələrdə insanların bədəninə qaşıq, çəngəl, qayçı və digər metal əşyaların yapışdığını göstərən videolar geniş yayılıb. Bunun Yerin elektromaqnit tezliyində baş verən dəyişiklik və sonuncu Günəş tutulması ilə əlaqəli olduğu barədə müxtəlif iddialar səsləndirilir. Həqiqətən, insanların bədənində birdən-birə maqnitlik yarana bilərmi? Serhedaz.az xəbər verir ki, Globalinfo.az-a danışan Bakı Dövlət Universitetinin (BDU) Astrofizika kafedrasının dosenti Xıdır Mikayılov deyib ki, bunun Yerin maqnit sahəsində dəyişiklik, Yerin "tezliyinin artması" və ya hər hansı astrofiziki hadisə ilə əlaqəsini təsdiqləyən heç bir elmi sübut yoxdur: “İnsan orqanizmi maqnit deyil və birdən-birə maqnit xüsusiyyəti qazanması mümkünsüzdür. Əgər belə olsaydı, yalnız dəmir əsaslı ferromaqnit əşyalar yox, alüminium, mis, plastik və hətta şüşə kimi maqnitə cəlb olunmayan materiallar da yapışmazdı. Halbuki bu tip videolarda tez-tez müxtəlif materiallardan hazırlanmış əşyaların da “yapışdığı” görünür. Bu isə hadisənin maqnitlə deyil, əsasən dərinin səthi, sürtünmə qüvvəsi, dərinin rütubəti, yağlılığı və əşyanın ağırlıq mərkəzi ilə əlaqəli dərəcədədir. Bəzən belə videolarda insanlar bədənlərini cüzi bucaq altında saxlayır və əşyaları elə yerləşdirirlər ki, onlar sürtünmə hesabına müəyyən müddət yerində qala bilir. Dərinin üzərinə talk pudrası (prisipka) çəkildikdə və ya səth qurudulduqda bu “effekt” adətən aradan qalxır. Bu da onun maqnit mənşəli olmadığını göstərir”.

Sərhəd.Az

Open In TikTok:

Region: AZ

Thursday 03 September 2026 10:05:42 GMT