ချစ်သူမိန်းကလေးကို ကြာကြာပစ်ထားရင်… တစ်နေ့မှာ မစောင့်တော့တဲ့သူ ဖြစ်သွားနိုင်တယ်.. မိန်းကလေးတစ်ယောက်ကို ချစ်တယ်ဆိုပြီး ကိုယ့်ဘက်က အချိန်မပေးဘဲ၊ စကားမပြောဘဲ၊ အရေးမထားသလိုနဲ့ ကြာကြာပစ်ထားမယ်ဆိုရင် သူမရဲ့စိတ်ထဲမှာ ဘာတွေဖြစ်လာမလဲဆိုတာ လူတော်တော်များများ မစဉ်းစားမိကြပါဘူး။ တစ်ချို့က “သူက ငါ့ကိုချစ်တာပဲ၊ ဘယ်လောက်ပစ်ထားထား စောင့်နေမှာပါ” လို့ထင်တတ်ကြတယ်။ ဒါပေမယ့် လူတစ်ယောက်ရဲ့ ခံနိုင်ရည်မှာလည်း အကန့်အသတ်ရှိပါတယ်။ အစပိုင်းမှာတော့ သူမက နားလည်ပေးပါလိမ့်မယ်။ “အလုပ်များနေလို့ဖြစ်မှာပါ”၊ “အဆင်မပြေတာတစ်ခုခုရှိလို့ဖြစ်မှာပါ” ဆိုပြီး ကိုယ့်အတွက် အကြောင်းပြချက်တွေ ရှာပေးနေတတ်တယ်။ စာမပြန်ရင်လည်း ထပ်စောင့်တယ်။ ဖုန်းမခေါ်ရင်လည်း ကိုယ်တိုင်ခေါ်တယ်။ ကိုယ်မပြောရင်လည်း သူမဘက်က စကားစတတ်တယ်။ ဘာကြောင့်လဲဆိုတော့ အဲဒီအချိန်မှာ သူမက ကိုယ့်ကို မဆုံးရှုံးချင်သေးလို့ပါ။ ဒါပေမယ့် အချိန်ကြာလာတဲ့အခါ စိတ်ထဲမှာ မေးခွန်းတွေ စတင်ဝင်လာတတ်တယ်။ “ငါ့ကို တကယ်ချစ်ရဲ့လား?” “ငါက မင်းအတွက် အရေးကြီးရဲ့လား?” “ဘာလို့ ငါတစ်ယောက်တည်းကပဲ အမြဲကြိုးစားနေရတာလဲ?” ဒီမေးခွန်းတွေကို မေးပြီး မေးခွန်းတိုင်းအတွက် အဖြေမရလာတဲ့အခါ သူမရဲ့မျှော်လင့်ချက်တွေ တဖြည်းဖြည်းလျော့လာတတ်တယ်။ အရင်လို မစောင့်တော့ဘူး။ အရင်လို မမျှော်တော့ဘူး။ အရင်လို ကိုယ့်ဆီက စာတစ်စောင်လာဖို့ ဖုန်းကို မကြည့်တော့ဘူး။ အဆိုးဆုံးကတော့ သူမရဲ့စိတ်ထဲမှာ “မင်းမရှိလည်း ငါနေနိုင်တယ်” ဆိုတဲ့အတွေး ဖြစ်လာတဲ့အချိန်ပါ။ တစ်ချိန်က ကိုယ့်ဆီက စာမရရင် စိတ်မကောင်းဖြစ်ခဲ့တဲ့သူက နောက်ပိုင်းမှာ စာမလာတာကိုတောင် မစောင့်တော့ဘူး။ တစ်ချိန်က ကိုယ်အေးစက်သွားရင် စိတ်ပူခဲ့တဲ့သူက နောက်ပိုင်းမှာ ကိုယ်အေးစက်တာကို အေးအေးဆေးဆေး လက်ခံနိုင်လာတယ်။ ဒါဟာ သူမမချစ်တော့လို့ မဟုတ်ပါဘူး။ နာကျင်ရတာတွေ များလွန်းလို့ ကိုယ့်စိတ်ကိုယ် ကာကွယ်တတ်လာတာပါ။ လူတစ်ယောက်ကို ကြာကြာပစ်ထားခြင်းဟာ သူ့ကို စောင့်ခိုင်းထားတာမဟုတ်ပါဘူး။ တစ်ခါတလေမှာ ကိုယ့်မရှိဘဲ နေတတ်အောင် သင်ပေးနေခြင်းနဲ့ တူပါတယ်။ ဒါကြောင့် ကိုယ့်ဘေးမှာ ကိုယ့်ကိုတကယ်ချစ်တဲ့သူတစ်ယောက်ရှိနေတယ်ဆိုရင် ရှိနေတုန်းမှာ တန်ဖိုးထားပါ။ စကားပြောပေးပါ။ အချိန်ပေးပါ။ သူမလိုချင်တာက နေ့တိုင်းအချိန်ပြည့် အာရုံစိုက်ပေးဖို့ မဟုတ်ပါဘူး။ “မင်းက ငါ့အတွက် အရေးကြီးတယ်” ဆိုတာကို လုပ်ရပ်လေးတွေနဲ့ ပြသပေးဖို့ပါ။ ဘာဖြစ်လို့လဲဆိုတော့ ချစ်ခြင်းတစ်ခုမှာ အဆုံးသတ်သွားတာဟာ တစ်နေ့တည်းနဲ့ မဟုတ်ပါဘူး။ တစ်နေ့ပြီးတစ်နေ့ လျစ်လျူရှုခံရခြင်း၊ မျှော်လင့်ပြီး စိတ်ပျက်ရခြင်း၊ ပြောချင်ပေမယ့် မပြောဖြစ်တော့ခြင်းတွေ စုပေါင်းလာပြီးမှ တစ်နေ့မှာ “မစောင့်တော့ဘူး” ဆိုတဲ့ ဆုံးဖြတ်ချက် ဖြစ်လာတာပါ။ အဲဒီနေ့ရောက်တဲ့အခါ ကိုယ်က ပြန်ဂရုစိုက်လာလည်း နောက်ကျသွားနိုင်ပါတယ်။ ချစ်တဲ့သူကို မဆုံးရှုံးချင်ရင် မပစ်ထားပါနဲ့။ တန်ဖိုးထားရမယ့်သူကို မရှိသလို မနေပါနဲ့။ ဘာလို့လဲဆိုတော့ တစ်ချို့လူတွေက အမြဲတမ်းစောင့်နေမယ့်သူတွေ မဟုတ်ကြပါဘူး။ တစ်နေ့မှာ တိတ်တိတ်လေး လက်လွှတ်ပြီး ကိုယ့်ဘဝကိုယ် ပြန်ရွေးချယ်သွားနိုင်သလို့ သူမ ဘ၀ကိုပျော်ရွင်စေနိုင်တဲ့ နောက်လူဆိုတာလည်း ပေါ်လာနိုင်ပါတယ်။ #tiktok #crd #08 #fyp #ကိုယ်ချင်းစာတတ်ကြပါစေ🙏🙏🙏🙏🙏 - @kira_littleheart