@afkarmohamed8: من أصعب التحديات بعد الولادة بالنسبة لي كانت فكرة: جسمي اتغير. إحنا بنكون فاهمين إن الحمل معجزة، وإن جسم الست بيتغير بشكل مذهل عشان يخلق حياة… وإن كل ده طبيعي، ومن إعجاز ربنا وعظمة جسمنا. بس ما كنتش فاهمة إن على قد ما أنا مقتنعة إن التغييرات دي طبيعية، على قد ما تقبّلها في نفسي هيكون صعب. أنا طول عمري وزني قليل، وكنت دايمًا بشتكي إني underweight، و معنديش أصلًا مشاكل مع جسمي . فعشان كده يمكن صدمتي بعد الولادة كانت أكبر شوية. ليه مش عارفة أحس إني خفيفة تاني؟ ليه حركتي مش زي الأول؟ جسمي هيرجع إمتى؟ وهل هيرجع أصلًا؟ ولا في نقطة معينة هقف عندها وأقول: خلاص، ده جسمي الجديد؟ والأصعب من كل ده إنك بعد الولادة بتبقي عايزة تهتمي بنفسك، بس كل اهتمامك تقريبًا رايح للـ baby. أنا لسه بحاول ألاقي وقت آكل فيه بهدوء، أو أشتغل، أو حتى أقعد مع نفسي شوية… فما بالكم بالرياضة والاهتمام بجسمي؟ فعايزة أسألكم من خبرتكم: إزاي رجعتوا تحسوا بنفسكم تاني بعد الولادة؟ إزاي قدرتوا تدخلوا الرياضة في يومكم مع وجود baby؟ إزاي لقيتوا وقت تهتموا بنفسكم من غير ما تحسوا بالذنب؟ قولولي tips & tricks بجد، خصوصًا لو مريتوا بنفس المرحلة دي. 🤍 عايزة أعرف إيه اللي ساعدكم ترجعوا تحبوا جسمكم وتحسوا إنكم رجعتوا لنفسكم تاني. #أمومة #ما_بعد_الولادة #جسم_ما_بعد_الولادة #رحلة_الأمومة #تعافي_ما_بعد_الولادة
