ҚМГ басшысы Асхат Хасеновтің мұнайшылар күнімен құттықтауы Құрметті әріптестер, сала ардагерлері! Сіздерді төл мерекеміз ‒ Қазақстан Республикасының мұнай-газ кешені қызметкерлері күнімен шын жүректен құттықтаймын! Бұл – ерекше мереке! Сіздердің қажырлы еңбектеріңізге, жоғары жауапкершіліктеріңізге және еліміздің тұрақты дамуындағы стратегиялық маңызы бар мұнай-газ саласына қосқан үлестеріңізге көрсетілген құрмет. Біз саладағы әрбір қызметкердің адал еңбегін қадірлейміз. Отандық мұнай-газ саласының құрылғанына ғасырдан астам уақыт өтті. Сол алғашқы кезеңнің қиындығын ардагер мұнайшылар еңсерді. Олардың сара жолын жаңа буын жалғастыруда. Осы ретте ардақты ардагерлерімізге ерекше алғыс білдіремін. Сіздердің еңбек жолдарыңыз ‒ жас мамандар үшін үлгі-өнеге. Біз саланың ұлағатты ұстаздары салған дара жолды жауапкершілікпен жалғастырамыз. Мемлекет басшысының тапсырмалары аясында ҚазМұнайГаз ел қорын толықтыру мақсатында ауқымды геологиялық барлау бағдарламасын іске асырып жатыр. Мұнай өндіру, тасымалдау және өңдеу бағытында кешенді жұмыстар жүргізілуде. Бұдан бөлек, мультипликативті әсер беретін ірі мұнай-газ химиясы жобалары қолға алынды. Сондай-ақ ұлттық компания өз қызметін жүргізетін өңірлерде халықтың әл-ауқатын жақсартуға бағытталған әлеуметтік және экологиялық жобаларды іске асыруда. Цифрландыру және жасанды интеллект жылында ҚазМұнайГаз өндірістік тиімділікті арттыратын цифрлық шешімдерді кеңінен енгізуде. Жалпы, барлық жетістіктердің артында біздің қызметкерлер тұр. Ең басты құндылығымыз – адамдар. ҚазМұнайГаз компаниялар тобында мердігер ұйымдарды қоса алғанда, 80 мыңнан астам маман еңбек етіп, Қазақстанның энергетикалық қауіпсіздігіне өз үлесін қосуда. Қадірлі мұнайшылар! Алдағы уақытта да мұнай-газ саласын өркендету жолында жұмыла қызмет ету ─ біздің ортақ мақсатымыз. Барша мұнай-газ саласы қызметкерлеріне зор денсаулық, отбасыларыңызға амандық, шаңырақтарыңызға бақ-береке, жұмыстарыңызға жеміс тілеймін. #Мұнайшыларкүні #ҚазМұнайГаз #КазМунайГаз #ҚМГ #КМГ - @kazmunaygas_official