ရန်ကုန်-မန္တလေးအမြန်လမ်း မိုင်တိုင် ၃၂ အနီး TikTok ရိုက်နေသည့် အမျိုးသမီးတစ်ဦး ကားတိုက်ခံရပြီး နေရာတွင်ပင် ကွယ်လွန် ပဲခူးမြို့နယ်အပိုင် ရန်ကုန်-မန္တလေး အမြန်လမ်းမကြီး မိုင်တိုင် ၃၂ အနီးတွင် စက်တင်ဘာ ၃ ရက် နံနက် ၉ နာရီခန့်က အမြန်လမ်းပေါ်တက်၍ TikTok ရိုက်ကူးနေသည့် သက်လတ်ပိုင်းအရွယ် အမျိုးသမီးတစ်ဦး ကားတိုက်ခံရပြီး ဖြစ်စဉ်နေရာ၌ပင် ပွဲချင်းပြီး သေဆုံးသွားသည့် ဝမ်းနည်းဖွယ်ဖြစ်စဉ်တစ်ခု ဖြစ်ပွားခဲ့ကြောင်း သိရသည်။ ဖြစ်စဉ်မှာ အဆိုပါ မိုင်တိုင်အနီး ကျေးရွာတွင် နေထိုင်သည့် အမျိုးသမီးသည် ကလေးအား ကျောင်းပို့ပြီးအပြန် အမြန်လမ်းမကြီးပေါ်တက်၍ TikTok ရိုက်ကူးနေစဉ် ဒိုင်နာယာဉ်တစ်စီးမှ ဝင်ရောက်တိုက်မိခဲ့ခြင်းဖြစ်သည်။ ယာဉ်မောင်းသူဘက်မှ ဟွန်းတီးသတိပေးခဲ့သော်လည်း သတိမထားမိဘဲ တိုက်မိခဲ့ခြင်းဖြစ်ကြောင်း ဒေသခံများ၏ ပြောကြားချက်အရ သိရသည်။ အခင်းဖြစ်ပွားပြီးနောက် မိုင်တိုင် ၃၂ အနီး တာဝန်ကျ ရဲတပ်ဖွဲ့ဝင်များက လာရောက်စစ်ဆေးကာ ရုပ်အလောင်းအား သယ်ဆောင်သွားခဲ့သည်။ ပြီးခဲ့သည့် စက်တင်ဘာ ၁ ရက်နေ့ကလည်း အဆိုပါနေရာအနီးတွင်ပင် လမ်းဖြတ်ကူးသည့် လသာကုန်းကျေးရွာနေ အမျိုးသမီးတစ်ဦးအား မှန်လုံယာဉ်တစ်စီးမှ ဝင်ရောက်တိုက်မိ၍ သေဆုံးခဲ့သည့် ဖြစ်စဉ်ဖြစ်ပွားခဲ့သေးသည်။ အမြန်လမ်းမကြီးသည် မော်တော်ယာဉ်များ အရှိန်လွန်မောင်းနှင်သည့် လမ်းမကြီးဖြစ်သဖြင့် လမ်းပေါ်တက်၍ ဓာတ်ပုံရိုက်ခြင်း၊ TikTok ရုပ်သံရိုက်ကူးခြင်းများနှင့် စည်းကမ်းမဲ့ လမ်းဖြတ်ကူးခြင်းများသည် အသက်အန္တရာယ်အထိ ထိခိုက်ဆုံးရှုံးနိုင်သဖြင့် အမြန်လမ်းမကြီးအနီး နေထိုင်ကြသူများနှင့် ခရီးသွားပြည်သူများအနေဖြင့် အထူးသတိပြု ဆင်ခြင်ကြပါရန် နှိုးဆော်အပ်ပါသည်။ #အမြန်လမ်းယာဉ်မတော်တဆမှု #TikTok #ပဲခူး #ရန်ကုန်မန္တလေးအမြန်လမ်း #MyDay - @alinn782023