کراچی: ڈیفنس میں تشدد کا نشانہ بننے والے نوجوان علی جعفری نے میڈیا سے گفتگو کرتے ہوئے کہا ہے کہ مقدمہ درج ہوگیا ہے، پولیس اور تمام عملے نے تعاون کیا، تاہم کچھ وقت انتظار کرنا پڑا۔ علی جعفری کا کہنا تھا کہ میں بس امید کررہا ہوں کہ مجھے انصاف ملے، جس نے غلط کیا اسے سزا ملے۔ علی جعفری کے ٹیچر عبداللہ جمال نے گفتگو کرتے ہوئے کہا کہ اس معاملے میں کوشش کی گئی کہ دونوں خاندانوں میں رضامندی ہوجائے۔ انہوں نے الزام عائد کیا کہ علی کو کئی دن ذہنی اذیت میں رکھا گیا اور پولیس نے بھی تقریباً دو گھنٹے انتظار کروایا کہ فریقین آپس میں سمجھوتہ کرلیں۔ عبداللہ جمال کے مطابق علی کی ٹانگ اور ہاتھ پر شدید نوعیت کے زخم آئے ہیں، بچے کے ساتھ کھڑے ہونا ضروری تھا، ورنہ شاید انصاف نہ ملتا۔ انہوں نے کہا کہ علی کے والد دل کے مریض ہیں اور ویڈیو میں سامنے آنے والی باتوں کے علاوہ بھی کچھ ایسے واقعات ہیں جو شرمناک ہیں۔ انہوں نے سوال اٹھایا کہ کسی کے بچے کو سڑک سے اٹھا کر گھمایا جائے، تشدد کیا جائے، تو یہ کیسے قابل قبول ہوسکتا ہے؟ عبداللہ جمال نے مزید کہا کہ کراچی میں حالیہ عرصے کے دوران مصطفیٰ عامر اور میر رضا جیسے کیسز میں لاشیں ملیں، شکر ہے کہ علی جعفری خیریت سے واپس آگیا۔ ان کا کہنا تھا کہ پیسوں کی لین دین کا کوئی معاملہ نہیں تھا، علی کو اس کے دوست فیصل نے بلایا تھا۔ بعض چینلز پر 50 سے 60 ہزار روپے کے تنازعے کی بات چلائی گئی، جو درست نہیں۔ انہوں نے کہا کہ اگر پیسوں کا معاملہ تھا بھی تو کیا کسی نوجوان کو اٹھا کر لے جانے اور اس پر تشدد کرنے کا جواز بنتا ہے؟ علی جعفری کے وکیل طلحہ بلوچ ایڈووکیٹ کے مطابق مقدمے میں علی فیصل، ابراہیم ملک، ابراہیم سمیت 5 افراد کو نامزد کیا گیا ہے، جبکہ حراساں کرنے، اغوا، جان سے مارنے کی دھمکی سمیت دیگر دفعات شامل کی گئی ہیں۔ وکیل نے کہا کہ مقدمہ اس لیے درج کرایا گیا ہے تاکہ آئندہ کسی اور بچے کے ساتھ ایسا ظلم نہ ہو۔ اگر کوئی چینل پیسوں کی لین دین کے حوالے سے خبر چلا رہا ہے تو وہ بھی آکر اپنا 161 کا بیان ریکارڈ کرائے۔ #Karachi #Defense #DHA #AliJafri #KarachiPolice #CrimeNews #PakistanNews #JusticeForAliJafri - @karachinews90