انٹرپول کے ذریعے کارروائی: بیرون ملک مفرور 60 خطرناک ملزمان کی فہرست تیار، 7ویں نمبر پر ساقی جان کا نام شامل پشاور: صوبے میں امن و امان کی صورتحال کو بہتر بنانے اور جرائم پیشہ عناصر کے خلاف آہنی ہاتھوں سے نمٹنے کے لیے خیبرپختونخوا پولیس نے ایک انتہائی اہم اور فیصلہ کن قدم اٹھاتے ہوئے بیرون ملک فرار ہونے والے تمام سنگین جرائم میں ملوث ملزمان کے خلاف گرینڈ کریک ڈاؤن کا باضابطہ فیصلہ کر لیا ہے۔ ذرائع کے مطابق حکومت نے واضح کر دیا ہے کہ اب صوبے میں کسی بھی قسم کے گینگ، گروہ یا مجرمانہ نیٹ ورک کو مزید برداشت نہیں کیا جائے گا ا ور عوام کے جان و مال کا تحفظ ہر صورت یقینی بنایا جائے گا۔ قانون سے آنکھ مچولی کھیلنے والے عناصر کے لیے زمین تنگ کرنے کا تہیہ کر لیا گیا ہے۔ بیرون ملک پناہ لینے والے مفرور اشتہاریوں کو قانون کے کٹہرے میں لانے کے لیے انٹرپول (Interpol) سے باضابطہ رابطہ کیا گیا ہے۔ اس سلسلے میں پولیس نے سنگین جرائم میں مطلوب ایسے 60 خطرناک ملزمان کی ایک تفصیلی فہرست تیار کر لی ہے جنہیں پاکستان لانے کے لیے ریڈ نوٹس جاری کیے جا رہے ہیں۔ تیار کردہ اس فہرست میں نمایاں ناموں میں 7ویں نمبر پر ساقی جان کا نام بھی شامل ہے، جو طویل عرصے سے قانون کی گرفت سے باہر تھا۔ سیاسی و سماجی حلقوں کی جانب سے حکومت اور پولیس کے اس عزم کو بے حد سراہا جا رہا ہے، اور اسے صوبے کو جرائم سے پاک کرنے کی جانب ایک تاریخی قدم قرار دیا جا رہا ہے۔ عوام کا ماننا ہے کہ اس موثر کارروائی سے نہ صرف جرائم کی شرح میں نمایاں کمی آئے گی بلکہ قانون کی حکمرانی بھی مضبوط ہوگی۔ - @aziz.khan.khiji.10