@moebayer: ريش وبطاطا بالفرن على الطريقة اليونانية 🍋🌿 ليمون، إكليل الجبل، ديجون وعسل… وكل النكهة بصينية وحدة. والصوص الأخضر؟ ضروري. المكونات • 1 كغم ريش • 500–700 غ بطاطا صغيرة، مقطعة أنصاف أو أرباع حسب حجمها • 1 بصلة كبيرة أو 2 بصلات متوسطة، مقطعة جوانح كبيرة، اختياري، بس بتعطي طعمة رائعة • ⅓ كوب زيت زيتون • عصير 2 ليمونة • برش ليمونة واحدة • 2 عود إكليل الجبل، الأوراق فقط • 1 ملعقة كبيرة خردل ديجون • 1 ملعقة كبيرة عسل • 1 ملعقة صغيرة أوريغانو مجفف • 1 مكعب مرق اختياري • ملح وفلفل أسود حسب الرغبة • 2–3 ملاعق كبيرة مي إذا احتاجت التتبيلة أول إشي، اغسل البطاطا منيح. أنا ما بقشرها، بس إذا بتحبوا ممكن تقشروها. وإذا كانت كبيرة، قطّعوها أنصاف أو أرباع حسب حجمها. بحط البطاطا والبصل بالصينية، والبصل اختياري بس بنصح فيه لأنه بعطي طعمة كثير حلوة. بنقع ورق الزبدة بوعاء مي لعدة دقايق لحد ما يطرى ويصير سهل يتشكل، وبحطه تحت الخضار. هيك حتى لو الصينية قعدت بالفرن أكثر من ساعة، بتنظف معك بسهولة من أحسن الحيل اللي جربتها بحياتي. للتتبيلة، بحط بالخلاط اليدوي زيت الزيتون، عصير وبرش الليمون، إكليل الجبل، خردل ديجون، العسل، الأوريغانو، مكعب المرق أو بودرة المرق، الملح والفلفل. بخلط كل المكونات على سرعة عالية لمدة دقيقة إلى دقيقتين، لحد ما تصير التتبيلة ناعمة جدًا وكريمية. بخلي جزء من التتبيلة على جنب عشان أستخدمه بآخر مرحلة، وبصب الباقي فوق البطاطا والبصل. بحط الريش فوقهم، وبغطي الصينية بورق الزبدة المبلول وبعدين الفويل. بدخلها فرن محمى مسبقًا على 200 درجة مئوية لمدة ساعة و15 دقيقة إلى ساعة ونص وهي مغطاية، حسب حجم وسماكة الريش وحجم البطاطا. بعدها بشيل الفويل وورق الزبدة، وبخليها 10–20 دقيقة تتحمر وتاخد لون حلو. بآخر مرحلة بدهن الريش بالتتبيلة اللي خليتها على جنب، وإذا بدك لون أقوى، شغّل الشواية آخر 1–3 دقايق مع مراقبتها منيح. صوص الزبادي الأخضر 🌿 • 1 كوب زبادي عادي • حفنة بقدونس • 1–2 عود بصل أخضر • 2 ملعقة كبيرة زيت زيتون • عصير نصف ليمونة • برش نصف ليمونة • ½ ملعقة صغيرة أوريغانو • رشة كمون • ملح وفلفل أسود • فلفل أخضر واحد — اختياري إذا بتحبوا الحار بحط كل المكونات بالخلاط اليدوي وبخلطهم لحد ما يصير عندي صوص ناعم وكريمي. إذا كان القوام ثقيل، بضيف ملعقة أو ملعقتين مي باردة وبخلطه مرة ثانية.

Moe Bayer

Open In TikTok:

Region: DE

Sunday 06 September 2026 09:03:47 GMT