@publik.al: Detaje të reja kanë dalë nga kontrolli i zhvilluar më 3 shtator në burgun e Durrësit, ku në sektorin B të institucionit të vuajtjes së dënimit janë zbuluar gjashtë aparate celularë. Sipas të dhënave të bëra publike, katër prej pajisjeve dyshohet se lidheshin me të dënuarit Artur dhe Klevis Hoxhosmani, Adi Çobën, i njohur me nofkën “Bozholi”, si dhe Renardo Nallbanin. Celularët janë gjetur të fshehur brenda një thesi boksi, i cili ndodhej në ambientet e palestrës së burgut. Pajisjet tashmë janë administruar për t’iu nënshtruar ekzaminimit të mëtejshëm nga ekspertët, ndërsa pritet që të dhënat e tyre të analizohen në kuadër të hetimeve. Për vëllezërit Artur dhe Klevis Hoxhosmani, kjo nuk do të ishte hera e parë që identifikohen me telefona celularë brenda burgut. Gjatë një kontrolli të zhvilluar më 15 maj, njërit prej tyre iu gjet një iPhone. Emrat e vëllezërve Hoxhosmani janë përmendur në një dosje të SPAK që lidhet me një grup të dyshuar për trafik ndërkombëtar të lëndëve narkotike. Sipas hetimeve, grupi dyshohet se ka trafikuar mbi 6 tonë drogë, me një vlerë të përllogaritur rreth 411 milionë euro, nga Amerika Latine drejt tregjeve europiane. Hetimi ka përfshirë edhe dëshmitë e Erion Alibej, i cili ka bashkëpunuar me drejtësinë dhe ka dhënë informacion mbi aktivitetin e grupit të dyshuar kriminal.

Publik MEDIA

Open In TikTok:

Region: AL

Sunday 06 September 2026 14:54:54 GMT