ពាក្យកាព្យជូនពរ *សូមឱ្យអ្នកទាំងឡាយ សុខសប្បាយទាំងអស់គ្នា កុំឱ្យមានរោគា ព្រមទាំងសាច់ញាតិសន្ដាន។ *ចូរខំប្រឹងប្រព្រឹត្ត សាងសុចរិតធម៌ឱ្យបាន សព្វថ្ងៃសាសនាមាន ខំធ្វើទានសីលភាវនា ។ *កើតមកក្នុងលោកិយ ទាំងប្រុសស្រីមានវាសនា ខំរៀនសូត្រធម៌អាថ៌ ទាន់សាសនាព្រះទ្រង់ញាណ។ *នោះទើបអ្នកស្គាល់ផ្លូវ នឹងដើរទៅកាន់និព្វាន ជាទីសុខក្សេមក្សាន្ដ លះបង់បានចាកមន្ទិល។ *ខំធ្វើអំពើល្អ សាងសីលធម៌កុំបីខ្ជិល បុណ្យកើតពីទានសីល ជួយរំកិលឱ្យផុតទុក្ខ ។ *ព្រះធម៌តែងរក្សា បុគ្គលណាអ្នកប្រព្រឹត្ត ដោយកាយវាចាចិត្ត សុចរិតឥតមានទាស់។ *បុគ្គលណាអ្នកសន្សំ ធម៌មុតមាំស្អាតខ្ពង់ខ្ពស់ ប្រតិបត្តិមិនឱ្យខុស នាំឱ្យបានសេចក្ដីសុខ។ *សុខនេះជាអានិសង្ស របស់អង្គធម៌សុចរិត វិសេសប្រពៃពិត គួរចូលចិត្តឥតសង្ស័យ។ *អ្នកណាប្រព្រឹត្តធម៌ មិនដែលស្គាល់ភ័យចង្រៃ បានសុខទាំងយប់ថ្ងៃ ក្នុងលោកិយនិងបរលោក។ *ចូរអ្នកសាងសុចរិត ខំប្រព្រឹត្តធម៌មានជោគ បានកើតក្នុងទេវលោក មាននិស្ស័យទៅនិព្វាន។ ចប់ - @sokphlauch5