*အမေရိကန်ပြည်တွင်းလုံခြုံရေးဌာနက ထုတ်ပြန်တဲ့ ရာဇဝတ်မှုကျူးလွန်သူတွေထဲ မြန်မာ ၁၂၃ ဦး ပါဝင်* (Washington, DC - Sept. 6, 2026 - 6 PM) အမေရိကန်ပြည်ထောင်စု ပြည်တွင်းလုံခြုံရေးဌာန DHS က အဆိုးတကာ့ အဆိုးရွားဆုံး အမေရိကန်နိုင်ငံတွင်း ရာဇဝတ်မှူကျူးလွန်သူတွေရဲ့ စာရင်းကို အင်တာနက်မှာ ထုတ်ပြန်ထားတာမှာ မြန်မာနိုင်ငံက ရွှေ့ပြောင်းအခြေချသူ ၁၂၃ ဦးထိ ပါဝင်လာပြီဖြစ်ပါတယ်။ စက်တင်ဘာ ၆ ရက်နေ့အထိ ဖမ်းဆီးထားသူ မြန်မာတွေထဲ မုဒိမ်းမှု၊ အသက်မပြည့်သေးသူတွေအပေါ် လိင်ပိုင်းဆိုင်ရာကျူးကျော်မှု၊ လူသတ်မှု၊ မူးယစ်ဆေးဝါးမှု၊ တရားမဝင် လက်နက်ကိုင်ဆောင်မှု၊ ပစ်ခတ်မှု၊ ဖေါက်ထွင်းမှု၊ ခိုးမှူ၊ လုယက်မှု၊ မူးယစ်ဆေး-အရက် သောက်ပြီး ယာဥ်မောင်းမှုနဲ့ တခြားအမှူကျူးလွန်သူတွေလည်းပါဝင်ပါတယ်။ အင်ဒီယားနား ၂၃ ဦး၊ မင်နီဆိုးတား ၁၈ ဦး၊ တက္ကဆတ် ၁၂ ဦး၊ နီဘရားစကား ၁၂ ဦး၊ နယူးယောက် ၅ ဦး၊ အရီဇိုးနား ၅ ဦး၊ ဝါရှင်တန်ဒီစီ ၁ ဦး နဲ့ တခြားပြည်နယ်ပေါင်းစုံက ရာဇဝတ်မှုကျူးလွန်သူတွေ ဖြစ်ပါတယ်။ အမေရိကန်ပြည်ထောင်စုမှာ ခုလို ရာဇဝတ်မှူကျူးလွန်သူတွေကို အများပြည်သူသိအောင် ဓါတ်ပုံနဲ့တကွ ထုတ်ပြန်ပြီး သတိပေးလေ့ရှိပါတယ်။ အထူးသဖြင့် မုဒိမ်းမှု၊ ကလေးသူငယ်လိင်ပိုင်းဆိုင်ရာ စော်ကားမှုကျူးလွန်သူတွေ ရပ်ကွက်အတွင်းနေထိုင်ရာမှာလည်း ရဲဌာနကို အကြောင်းကြားရပြီး၊ အများပြည်သူကြည့်ရှုနိုင်တဲ့ အင်တာနက်စာမျက်နှာမှာလည်း မှတ်ပုံတင်ရပါတယ်။ ဒီလိုရာဇဝတ်မှု ကျူးလွန်သူတွေရဲ့ မျက်နှာကို ဆင်ဆာလုပ်ပြီး ထုတ်ပြန်တာမျိုး မရှိပါဘူး။ အမေရိကန်သမ္မတ ဒေါ်လ်နယ်ထရမ့် Donald Trump ရဲ့ လူဝင်မှုကြီးကြပ်ရေးမူဝါဒထဲမှာ ခုလိုရာဇဝတ်မှုကျူးလွန်တဲ့ ရွှေ့ပြောင်းအခြေချသူတွေကို ဖမ်းဆီးပြီး ပြည်နှင်ဒဏ်ပေးဖို့ က အဓိကဦးစားပေးအစီအစဥ်အဖြစ် ပါဝင်နေတာပါ။ အမေရိကန်နိုင်ငံအတွင်း ရာဇဝတ်မှုကျူးလွန်ထားသူတွေ၊ အထူးသဖြင့် အများပြည်သူလုံခြုံရေးအတွက် အန္တရာယ်ရှိတယ်လို့ သတ်မှတ်ခံထားရသူတွေကို ပစ်မှတ်ထား ဖမ်းဆီးပြီးပြည်နှင်ဒဏ်ပေးသွားမယ်လို့ မူဝါဒချမှတ်ထားပါတယ်။ ဒါကြောင့် DHS နဲ့ လူဝင်မှုကြီးကြပ်ရေးအာဏာပိုင်တွေက ရာဇဝတ်မှုမှတ်တမ်းရှိတဲ့ ရွှေ့ပြောင်းအခြေချသူတွေကို အထူးအာရုံစိုက်လာတာ ဖြစ်ပါတယ်။ ဒီလိုရွှေ့ပြောင်းအခြေချသူတွေထဲက ရာဇဝတ်မှူကျူးလွန်သူတွေ ပြစ်ဒဏ်ကျခံပြီးတဲ့နောက် လွတ်ရက်စေ့တဲ့အခါမှာ အကျဥ်းဦးစီးဌာနက DHS လုံခြုံရေးဌာနကို အကြောင်းကြားရပြီးနောက် လွှဲပြောင်းပေးရတာပါ။ အဲဒီနောက် DHS က ပြည်နှင်ဒဏ်ပေးဖို့ ဆက်ပြီးဆောင်ရွက်နိုင်တာ ဖြစ်ပါတယ်။ #အမေရိကန် #ဒေါ်နယ်လ်ထရမ့် #dhs #ပြည်နှင်ဒဏ် #မြန်မာ #myanmar #အောင်ဆွေ #aungswaymedia #aungsway - @aungsway