Bakı şəhərinin Nəsimi rayonu ərazisində baxımsız qalan yaşıllıqlar sakinlərin və sürücülərin hərəkətinə ciddi maneə törədir. Patrul.az-ın məlumatına görə, problem Şah İsmayıl Xətai küçəsində, “Yaşıl bazar”ın qarşısında qeydə alınıb. Sözügedən ünvanda vaxtında aqrotexnik qulluq göstərilməyən və budanmayan ağacların budaqları səkilərə doğru uzanaraq piyada keçidini məhdudlaşdırıb. Ərazidən istifadə edən piyadalar həm səkiyə sallanan, həm də yerə qırılıb tökülən budaqlar səbəbindən hərəkət etməkdə böyük çətinliklərlə qarşılaşırlar. Bununla yanaşı, yaşıllıqların nizamsız böyüməsi sürücülərin də yolda görmə bucağını məhdudlaşdırır və nəqliyyat vasitələrini təhlükəsiz park etməyə mane olur. Nəsimi rayon sakinləri yaranmış narahatlığın aradan qaldırılması üçün Bakı Şəhər İcra Hakimiyyəti Yaşıllaşdırma Təsərrüfatı Birliyi və aidiyyəti qurumlardan sözügedən ünvanda təcili olaraq budama işlərinin aparılmasını xahiş edirlər. - @patrul.az.official