@mohammadadil2062: صَاحِي سِيب الغفلَة ـــــــــــــــــــــــــــــــــــــــــــــــ كلمات: مصطفي بطران أداء الفنان: بادي محمد الطيب ـــــــــــــــــــــــــــــــــــــــــــــــ صَاحِي سِيب الغفلَة ورَقق المنظُوم صِف جَمَال الحَفْلَة الكل دُور منظُوم *** ديل بدُور مُحْتفْلَة أمْ شبَاب مصْيُون يَحْكِي الأرائل الجَافْلَة يَفُوق عليها عيُون يَسْبِي صَاحِب النّافلَة حَاشَي ما مَخْيُون مِنهُ تبْرِي التّفلَة الهَائِم المعيُون *** كالحَديقة الزَّاهرة أُمْ نَسيماً فَاح بِي رَوايِحاً بَاهرة بالمِسك فَوَّاح مالاَ عِيني السّاهرة دمعها الطّفَاح والخدُود الجَاهرة مِن جَنِي التُّفَاح *** فِيها عَقْلِي إتْجرّدْ مِنِّي فَرَّ وطَار والقِلِيب إتْهَرّدْ حَلتُو الأخْطَار والنّسِيم إتْشرّدْ عَبَّق الأقْطَار والبلِيبِلْ الغَرّدْ والسرُور مَطَّر *** صَابْنِي ظَبْياً أكْحَلْ طَرْفَهُ الوَسنَان للخَلائِق أنْحَلْ من لِحَاظ وسِنان لمّا قَام يَتَرجّل بين لطُوف وحَنَان خِلّي عَقلِى إتْوهل رِكبوُ اْلْف جنَان *** الرّتاين الوَالْعَه من شِلُوخُو تُنَار والفصِيد الشّالعه روضة فُوق لمَنَار ما فِي شَمساً طَالعه لو سَناهُ أنَار يا قلُوبنَا الهَالعة للسّهام خَطْ نَار ** مَرّ لي يتنّقَلْ بي حِجِيلُو يَرِز بالصدِير يَتفّقَلْ مَرّة يَحْكِي الوِز يَا شبِيه الوَقّلْ يا سُلَالة العِز الرّسُول تِتقَلْ خَلِّي هَمِّي يَلِز ** الفوِيطر الضوَّه للظّلَام فَجّاجْ والكِفِيل الهَوّه للعِقُول رَجّاجْ قلبي ده شِنْ سوّه مع العيون في لِجاجْ أصْلُو آخَر العَوّه يَفضَي يبقَي عَجَاجْ ** جوّك كم طَار نَدٌو والسعُود في حِمَاك نجم حظّك يبدُو في سَمَاهُو سَمَاك والبَلابِل تشدُو إنْتَ مَا أسْماك واللّطيف يا عبدُو بالسرُور عَمّاك #حقيبة_الفن_السوداني

حقيبة الفن السوداني 🇸🇩🤍🎞🍷

Open In TikTok:

Region: SD

Monday 07 September 2026 13:13:25 GMT