با ڕاستگۆ بین، پاراستنی ئیمان و داوێنپاکی لەم زەمانەدا، ڕێک وەک ئەوە وایە بڵێسەیەکی ئاگر بگریت بەدەستەوە و نەهێڵیت بکوژێتەوە. لە سەردەمی سەحابەکاندا، گوناهکردن قورس بوو، کۆمەڵگاکە خۆی پاڵپشتی چاکە بوو. هەرکاتێکیش دڵیان توند دەبوو یان ئیمانیان لاواز دەبوو، ڕاستەوخۆ دەچوونە خزمەت پێغەمبەر( د.خ)؛ تەنها یەک سەیرکردن و زەردەخەنەی ئەو، وەک شەپۆلێکی گەورەی وزە (ئێنێرجی)، هەموو غەم و تاریکییەکی ناخیانی دەشۆردەوە و سەرلەنوێ دایدەگیرساندنەوە. بەڵام ئێستا چی؟ بەیانیان پێ دەخەیتە دەرەوە، بازاڕ، زانکۆ، شوێنی کار و سەیرانگاکان بوونەتە پێشانگای ڕووتگەری و هەڕاجکردنی جەستە. پێشتر دەبوو مرۆڤ خۆی بەدوای حەرامدا بگەڕێت، بەڵام ئێستا گوناه خۆی دێتە ناو ژووری خەوتنەکەتەوە. بە یەک کلیکی سەر مۆبایلەکەت، گەورەترین قومارخانەی ئۆنلاین و هەزاران داوی فەسادی لە بەردەستتدایە. لەم زەمانەدا گوناهکردن لە ئاوخواردنەوە هەرزانتر و ئاسانتر بووە. لەم ناوەدا کێ ماوە دەستت بگرێت؟ مەلاکان؟ با خۆمان هەڵنەخەڵەتێنین. ئەو کەسانەی کە دەبوو شوێنگرەوەی پێغەمبەر بن و ببنە فریادرەس بۆ گەنجان، بەشێکی زۆریان دیندارییان کردووەتە پەیج، لایک و بازرگانی. لەسەر مینبەر بە گریانی درۆینەوە باسی زوهدت بۆ دەکەن، بەڵام لەولاوە خەریکی ململانێی سەرمایەداری و گۆڕینی مۆدێلی سەیارەکانیانن. لەناو سەد مەلادا ئەگەر یەکێکیان بە پاکی و بێ تەماعی مابێتەوە. گەنج کاتێک ئەم دووڕووییە دەبینێت، ڕق دەیگرێت و هەست دەکات لەناو ئەم زەلکاوەدا بەتەواوی بێ پشتوپەنا ماوەتەوە. بۆیە، کاتێک لەناو ئەم هەموو قوڕاوەدا کەڕامەتی خۆت دەپارێزیت، کاتێک شەپۆلی حەرام و قومار بەرۆکت دەگرێت و تۆ بە سەربەرزییەوە پێی لێ دەدەیت، خێری تۆ هێندەی شاخێکە. یوسف پێغەمبەر تەنها لە یەک ژووری داخراودا و لەلایەن یەک زولەیخاوە تاقی کرایەوە، بەڵام تۆی گەنجی ئەمڕۆ، مۆبایلەکەت، زانکۆکەت و کۆڵانەکەت پڕە لە زولەیخا کە ڕۆژانە بانگت دەکەن و تۆش ڕەتیان دەکەیتەوە. "لە سەردەمێکدا کە هەرزانترین شت جەستەیە و ئاسانترین شتیش گوناهە، هەر گەنجێک لەناو ئەم هەموو زولەیخایەدا قوفڵی کەڕامەت و ئیمانی خۆی نەشکێنێت، پاڵەوانێکی بێدەنگ و یوسفی ڕاستەقینەی ئەم زەمانەیە!" کەمال گەزنەیی-٧-٩-٢٠٢٦ #hawler #slemani #duhok #kurdistan #کەمال_گەزنەی - @dejavoo__0