القصة الحقيقية ورا الجملة دي، بطلتها هي الأستاذة صالحة عبدالفضيل، مديرة مدرسة «الشهيد أحمد كمال» بكفر الجزار - القليوبية. 🏫 سيدة أرملة، ومصابة بأمراض مزمنة، لكن المدرسة بالنسبة لها مش مجرد وظيفة، دي حياتها، وبيتها التاني، والطلاب ولادها. ❤️👩‍🏫 لدرجة إنها بتقعد لحد بعد صلاة العشاء كل يوم، تتابع أعمال الصيانة بنفسها، من أول النجارة والنقاشة، لحد الزرع والنضافة.. يعني مديرة بدرجة «أم». 😍🧑‍💼 استلمت مبنى المدرسة وهو «خر.ابة»! لا صرف، ولا كهرباء، ولا مياه، ولا غاز، ولا أمن.. يعني حالة ميؤوس منها تمامًا. 🚧🔨 قدمت طلبات، واشتكت عشرات المرات للإدارة التعليمية عشان دعم مادي، ولو حتى 5 آلاف جنيه.. لكن الإجابة كانت دايماً واحدة: «مفيش فلوس!». 🗣️🚫 تعمل إيه والترم قرب يبدأ؟ تسكت؟ 🤐 لأ طبعاً.. الأستاذة صالحة «اسم على مسمى».. قررت تصلح كل حاجة من جيبها الخاص، ووصلت كل المرافق، وجابت شباب لأمن المدرسة عشان يحموا الولاد.. كله من فلوسها وفلوس «أولاد الحلال» من أولياء الأمور.. وعملت ده كله في صمت، من غير ما تطلب «اللقطة» ولا حد يشكرها. 🤫💪 لحد ما جه المحافظ في زيارة مفاجئة، ومعاه «كتيبة» تصوير، عشان يمسكوا عليها غلطة، ويكونوا هما «النجوم» في الصورة المعتادة اللي كلنا حافظينها. 🤔📸 أول ما دخل الفصل، وحط إيده على الديسك، لقى شوية تراب، وبدل ما يسمع منها أو يشكرها على مجهودها.. قالها كلام صعب: «إزاي هعلم الطلاب النظافة وأنا و.سخ؟». 😠 الأستاذة صالحة بقمة الأدب والاحترام والمهنية، ردت عليه: «أنا استلمت المدرسة مفيهاش مرافق خالص، فدفعت 18 ألف جنيه تصليحات وصيانة من جيبي الخاص أنا والوكيل». 🙏💼 لكن مسؤول تالت حاول يحرجها للمرة التانية وقالها: «عاوزة تفهميني إنك بتصرفي على الدولة؟ ده كلام ما يدخلش عقل عيل صغير!». 👀💬 وهنا كان الرد «القاضية» من الأستاذة صالحة: «لأ حضرتك مش بصرف على الدولة، بس لما أبعت للإدارة التعليمية واستغيث ومحدش يستجيب، أعمل إيه؟ إيه ذنب العيال وأهاليهم؟». 🔥🎯 وقامت مطلعة «المستندات» والفواتير اللي مستفاها، وورتهم كل حاجة.. كلهم وقفوا في صمت، ومحدش قدر يفتح بوقه معاها، وحسوا بالندم على تسرعهم، وقالوا في النهاية: «ماشي، هنبقى نشوف الموضوع ده». 🙊📄 أجمل حاجة لما تروح تدور على لقطة وبرستيج، فتصدمك «الست المصرية الجدعة» بالفواتير والواقع! 😉💸 وكمان بتقولي «متحسسنيش إنك بتصرفي على الدولة؟!» ده هو ده اللي هامك؟! ما هي فعلًا بتصرف وشالت عنك أعباء كتير بإنها قامت بدور مش دورها! 🙄 عشان كده، كل المصريين بيطالبوا السيد وزير التربية والتعليم إنه يتواصل مع الأستاذة صالحة ويشكرها بنفسه، ويكرمها بالشكل اللي يليق بيها وباللي قدمته. 🤝🏆 لأن دي مش مجرد مديرة مدرسة أدت وظيفتها، دي «مواطنة بدرجة أم» شافت مشكلة، ولما ملقتش استجابة، اتحملت المسؤولية ودفعت من جيبها عشان الولاد يكونوا في مكان آمن ومحترم. ❤️✨ بورك فيكي يا أستاذة صالحة، وبمثلك فعلًا «تزدان الأوطان». 😍💯 . . #viral #مصر #نوح_مخيمر #عاجل #خبر - @nooh_mekhemar