အာနာပါနကမ္မဋ္ဌာန်းသည် အလွန်တန်ခိုးသတ္တိကြီးမား၍ အင်အားအကောင်းဆုံး ပြည့်ဝစေနိုင်သော ကမ္မဋ္ဌာန်းဖြစ်ပေသည် ။ ဝိသုဒ္ဓိမဂ် ဆရာကြီးက ….. “ဤအာနာပါနကမ္မဋ္ဌာန်းကား လေးလေးပင်ပင် လေးလေးစားစား အားကြိုးသနွှဲ ဂရုတစိုက်လုပ်မှရသော ကမ္မဋ္ဌာန်းဖြစ်သည် ။ ဘုရားပစ္စေကဗုဒ္ဓါ သာဝကကြီးများဖြစ်ကြသော ဘုန်းနှင့်သမ္ဘာ ထက်ကြပ်ပါသည့် မဟာပုရိသ လူအာဇာနည်ကြီးတို့သာလျှင် နှလုံးသွင်းရာ ကမ္မဋ္ဌာန်းဖြစ်သည်။ ထို လူအာဇာနည် ကြီးများပင်သော်မှ ခဏတဖြုတ်လုပ်၍ရသော ကမ္မဋ္ဌာန်းမဟုတ် ဘုန်းကံနည်းပါးသော သတ္တဝါအညံ့စားတို့၏ အရာလည်းမဟုတ်” ဟု ( ဝိသုဒ္ဓိမဂ် -၁-၂၇၆) မိန်းမှာတော်မူခဲ့သည်။ မြတ်စွာဘုရားရှင်ကလည်း ….. “သတိပညာမရှိသူအား ဤကမ္မဋ္ဌာန်းကို ငါ မဟော မပေး “ ဟု ( အာနာပါနသံယုတ် ဥပရိအာနာပါနဿတိ သုတ်တို့၌) အတည့်အလင်း ထုတ်ဖော်တော်မူခဲ့၏။ ကမ္မဋ္ဌာန်းအားလုံး၌ပင် သတိနှင့်ပညာမပါ၍မဖြစ် သို့ရာတွင် ……. ဤအာနာပါနကမ္မဋ္ဌာန်း၌ကား အထူးတဖြင့် ပို၍လိုအပ်သောကြောင့် ယင်းသို့မိန်းတော်မူခြင်းဖြစ်သည်။ လေးလေးစားစား သတိပညာများများဖြင့် အားကြိုးသနွှဲ စွဲစွဲမြဲမြဲ စူးစူးစိုက်စိုက် လေးလေးပင်ပင် အားထုတ်ကြ”ဟု သိစေတော်မူလိုသည် ။ စင်စစ်ကား …….. အာနာပါနကမ္မဋ္ဌာန်းသည် ဘဝသံသရာက ပါရမီမျိုးစေ့ အလေ့အထုံ ပါသူများအတွက် ထူးခြားသော တန်ခိုးသတ္တိများကိုပါ ရစေနိုင်၏ ။ သမထ ဝိပဿနာ စွယ်စုံရသော ကမ္မဋ္ဌာန်းကြီးပါပေးတည်း။ အာနာပါန ကမ္မဋ္ဌာန်းကို လေးကျက်ပွါးများ၍ ရဟန်းကိစ္စ ပြီးမြောက်သွားသော အရှင်မြတ်များသည် “မိမိတို့ ပရိနိဗ္ဗာန်ပြုရမည့် အချိန်အခါကို မိနစ် စက္ကန့် မလွဲ ကြိုတင် သိမြင်တော်မူကြ၏ “ အခြားကမ္မဋ္ဌာန်းဖြင့် ပေါက်မြောက်သော အရှင်တို့ကား သိသည်လည်းရှိ၏ မသိသည်လည်းရှိ၏ မသေချာ ။ စင်စစ် ရဟန္တာ အရှင်မြတ်ကြီးများကို မဆိုထားဘိ အတန်အသင့် ပေါက်မြောက်သော ယောဂီတို့ပင် ကိုယ့်အလောင်းကိုယ် အတိအကျ ကြိုတင်ပြင်ဆင် ပြောကြား သွားနိုင်သူများ မရေမတွက်နိုင်အောင် များကုန်၏။ မြတ်စွာဘုရားရှင်ကလည်း……. ထိုသို့သိမြင်နိုင်ကြောင်း အရှင်ရာဟုလာ အား “ဝိဒိတာ ဝ နိရုဇ္ဈန္တိ နော ဝိဒိတာ” ဟုတိုင်ရိုက် ( မ-၁၊၈၉)။ ဟောတော်မူထားလေသည် ။ ရိုသေလေးစွာ အားထုတ်တော်မူကြပါကုန် စံတော်ဝင် အရိယာများ ( နှာ-၄၄၂-၄၄၃) (8,9,2026) - @dhamma96943