نفس کی اصلاح الفاظ سے نہیں ہوتی۔ کتنی ہی نصیحتیں کر لی جائیں کتنے ہی وعظ سن لیے جائیں، نفس اپنی جگہ اَڑا رہتا ہے۔ وہ باتوں کا اسیر نہیں وہ صرف نور کے آگے جھکتا ہے۔ انسان اکثر یہ سمجھتا ہے کہ علم کی باتیں دلائل اور منطق سے دل بدل جائے گا۔ مگر حقیقت یہ ہے کہ نفس ایک ایسی سرکش قوت ہے جو زبان کی زد میں نہیں آتی۔ وہ ہر دلیل کا جواب تراش لیتا ہے ہر نصیحت کو ٹال دیتا ہے ہر وعدہ کل پر ڈال دیتا ہے۔ یہی وجہ ہے کہ بڑے بڑے واعظ بھی خود اپنے نفس کے ہاتھوں مجبور رہ جاتے ہیں۔ تو پھر تبدیلی کیسے آتی ہے؟ جب دل کے اندر وہ نور جاگتا ہے معرفت کا نور یقین کا نور اللہ کی محبت اور اس کے حضور کا احساس تو نفس کو کوئی دلیل نہیں دینی پڑتی۔ وہ نور خود ایک ایسی روشنی ہے جس کے سامنے اندھیرا خود بخود پیچھے ہٹ جاتا ہے۔ یہ زبردستی کا معاملہ نہیں یہ ایک فطری سرنڈر ہے۔ جیسے سورج نکلتے ہی رات کہیں تلاش نہیں کرنی پڑتی وہ خود چلی جاتی ہے۔ یہ نور کہاں سے آتا ہے؟ یہ ذکر سے آتا ہے سجدے کی گہرائی سے آتا ہے راتوں کے اس سناٹے سے آتا ہے جب بندہ اپنے رب کے سامنے بےنقاب ہو کر رو دیتا ہے۔ یہ نور اس وقت جاگتا ہے جب انسان علم کو صرف سننے کی چیز نہیں بلکہ محسوس کرنے کی چیز بنا لیتا ہے۔ جب قرآن صرف پڑھا نہیں جاتا بلکہ دل میں اترتا ہے۔ جب اللہ کا خوف اور اس کی رحمت دونوں ایک ساتھ دل میں بس جائیں۔ اس لیے اصل کام نصیحت کرنا نہیں، نور جگانا ہے پہلے اپنے اندر پھر دوسروں کے اندر۔ خود کو بدلنے کی کوشش الفاظ سے نہ کریں بلکہ اس تعلق کو مضبوط کریں جو دل میں روشنی پیدا کرتا ہے۔ نماز، ذکر، تلاوت، توبہ، اور اللہ سے مسلسل رجوع یہی وہ راستے ہیں جن سے وہ نور جاگتا ہے جس کے سامنے نفس خود بخود جھک جاتا ہے۔ یاد رکھیں نفس کو مغلوب کرنے کی جنگ زبان سے نہیں دل کی روشنی سے جیتی جاتی ہے۔ - @hsinad6