@jamiivoice_: HABARI: Mkurugenzi Mkuu wa Mamlaka ya Mawasiliano Tanzania (TCRA), Mhandisi Peter Mwasalyanda, amesema ushiriki wa wadau wote ni muhimu katika kudhibiti matukio ya kihalifu yanayofanyika kupitia huduma za simu na intaneti. Mwasalyanda ameyasema hayo Septemba 7, 2026, wilayani Kilombero, mjini Ifakara, katika mkutano na wadau wa mawasiliano, wakiwemo kampuni za simu, viongozi wa Serikali, madiwani pamoja na wakuu wa vyombo vya ulinzi na usalama. Amesema mafanikio katika juhudi za kudhibiti uhalifu unaofanyika kupitia mitandao yanategemea ushirikiano wa kila mdau katika nafasi yake, huku akisisitiza kuwa TCRA itaendelea kutoa ushirikiano kwa wadau wote. Katika mkutano huo, viongozi na wananchi wa Ifakara wameelezwa umuhimu wa kushiriki katika kupambana na utapeli wa mitandaoni, hususan kwa kutoruhusu laini zao za simu kutumiwa na watu wengine. Mamlaka hiyo imeeleza kuwa baadhi ya wananchi wamekuwa wakiruhusu watu wengine kusajili laini kwa kutumia taarifa zao kwa malipo madogo, kisha laini hizo kutumika katika vitendo vya utapeli. Wananchi wamekumbushwa kuhakiki laini zao za simu kwa kutumia *106#, kuripoti namba zinazotumika kufanya utapeli kwa kutuma ujumbe mfupi wenye namba ya tapeli kwenda 15040 bila malipo, pamoja na kutoa taarifa mara moja pindi simu inapopotea au kuibiwa. Aidha, wameonywa kutotoa ushirikiano kwa mtu anayejitambulisha kuwa mtoa huduma wa kampuni ya simu bila kuthibitisha, huku wakikumbushwa kuwa huduma za kampuni za simu zinapaswa kuthibitishwa kupitia namba 100; simu kutoka namba nyingine zinazodai kutoa huduma zinapaswa kuchukuliwa kwa tahadhari.

Jamii Voice

Open In TikTok:

Region: TZ

Wednesday 09 September 2026 18:14:05 GMT