Ma Xasusataa Carurnimadadi, waxaad is lahayd: “Markaan weynaado, wax walba way ii fududaan doonaan.” Waxaad moodaysay in weynaantu tahay albaabka xorriyadda; inaad markaas meel kasta tegi karto, waxaad rabto samayn karto, cidina aysan kuu sheegi doonin waxa aad samaynayso. Waxaad sugaysay inaad weynaato… Laakiin waad weynaatay. Markaas waxaad ogaatay in weynaantu aysan ahayn sida aad maskaxdaada ugu sawiran jirtay. Waxaad heshay xorriyaddii aad rabtay, laakiin waxaad la kulantay masuuliyad aanad filayn. Waxaad heshay awood aad meel kasta ku tagi karto, laakiin mararka qaar waxaad jeclaanaysaa inaad dib ugu noqoto gurigii aad carruurnimada ku ciyaari jirtay. Markaas ayaad bilaabaysaa inaad u xiisto waxyaabo aad markii hore caadi u arkaysay. Codadkii aad maqli jirtay. Dadkii kuu dhawaa. Maalmihii aanad wax badan ka fikirin. Subaxyadii aad hurdada ka soo kici jirtay adigoon garanayn waxa ay tahay walwalka berrito. Waxaad markaas fahmaysaa xaqiiqo xanuun badan: Mararka qaar qiimaha waxa aan haysanno ma garanno ilaa uu xusuus noqdo. Laakiin sheekadu halkaas kuma dhammaanayso. Maanta waxaad leedahay waxyaabo aad rabto inay is beddelaan. Waxaad leedahay dhibaatooyin aad doonayso inaad ka gudubto, waxaadna naftaada ku leedahay: “Markaan taas helo, markaas ayaan farxi doonaa.” Laakiin ka waran haddii maalintaas aad gaadho, haddana aad hesho wax kale oo aad sugto? Sidaas ayay noloshu u socotaa. Carruurnimadii waxaad sugaysay weynaanta. Markaad weynaatayna waxaad sugaysaa xasilloonida. Markaad wax hesho waxaad doonaysaa wax kale. Markaad meel gaadhana waxaad xasuusataa meel aad kasoo timid. Noloshu mararka qaar ma aha inaad dhibka ka baxdo; waa inaad barato inaad ku dhex noolaato adigoon lumin naftaada. Sababtoo ah sannado kadib, waxaa laga yaabaa inaad dib u eegto maanta oo aad tiraahdo: “Waxaan jeclaan lahaa inaan waqtigaas si ka duwan u noolaan lahaa.” Haddaba ha sugin berri si aad maanta u bilowdo nolosha. Hal mar dib u eeg waxa aad haysato. Qofka aad jeceshahay la hadal. Qosol marka aad awooddo. Tag meel aad mar walba rabtay inaad tagto. Waqti sii dadka aad jeceshahay. Naftaada ha ku lumin wax aan dhammaanayn. Qabso maanta. Waayo daqiiqaddan aad hadda ku jirto, oo laga yaabo inaad u aragto mid caadi ah, waxay noqon kartaa maalin aad sanado yar kadib si qoto dheer ugu xiisto. Maanta waxaa laga yaabaa inaad ka cabanayso nolosha… Berrina waxaad u ooyi kartaa xusuusteeda. Haddaba, inta aad weli joogto meesha aad joogto, si dhab ah u noolow. Ha sugin maalinta aad wax walba hesho. Noloshu ma sugayso. Wax kasta oo aad maanta haysato, si mudan u qadari; sababtoo ah maalin uun waxaad ogaan doontaa in waxa aad maanta iska indho-tirayso ay ahaayeen qaar ka mid ah waxyaabihii ugu quruxda badnaa ee noloshaada. Berri ha u tegin adigoo maanta ka maqnaa. Noolow maanta… Si markaad berri dib ugu soo laabato Xasusta nolosha maanta, aadan u odhan: “Haddii aan ogaan lahaa qiimaha maalmahaas…” Wa Nasir - NABAD AHOW🫂🗿 - @nasir_fiid