“Abti cidna danbi kama gelin, Abti waa xanuunsanahay, Abti waa gaajaysanahay, saakay ayaa cunto iigu dambaysay.” Waa baryadii ugu dambaysay ee Axmed Shire. Isagoo xanuunsan, gaajaysan, aan isdifaaci karin, geeriduna hortaallo ayuu si naxariis leh u baryey kuwii dilayay. Wuxuu magansaday Islaanimo, dadnimo, Soomaalinimo iyo ehelnimo, laakiin midna qalbigooda ma jilcin, ma damqin, baryadiisii ayay duubeen, dabadeedna dileen. Waxaa jira dil aan ku ekaan geerida hal qof iyo murugada ehelkiisa, balse noqda muraayad ummadi isku eegto oo ay ku aragto halka ay damiir ahaan joogto. Dilka Axmed waa muraayaddaas. Waa dil bahalnimo ah, hase ahaatee bahalnimaduse hal maalin kuma dhalato, qori maleeshiyaad oo keliyana laguma arko ee waxaa baraariya marka dilka caadi noqdo, aargoosigu caddaaladda beddelo, arxan-darradu ciqaab la’aan noqoto. Waxay sidoo kale kortaa marka hooyo ooyaysa gurigeeda xoog looga saaro, aabbe waayeel baryadiisa la maqli waayo, carruur saqdhexe qeylo iyo cabsi hurdada looga kiciyo, askari daraysan xiran caruurta dibada loogu tuuro, cagafna lagu hor dumiyo hoygii qoyskooda. Haddii baryadii Axmed qalbigaaga gilgishay, waa inay sidoo kale baryada hooyada, odayga iyo ilmuhu gilgilaan, Damiirku laba qalbi ma laha. Kuwa Axmed dilay iyaga ayaa ka mas’uul ka ah dambiga ay galeen, waana in caddaalada la horkeenaa, laakiin dilkiisu wuxuu nagu bixinayaa inaan eegno cudur ka weyn oo ah damiir la’aanta iyo arxan-darrada ku sii baahaysa siyaasadda, hay’adaha dawladda iyo bulshada. Marka awooddu weydo damiir dabra, sharci xakameeya iyo akhlaaq hagta, arxan-darradu waxay isu beddeshaa caado, naxariistu way dhimataa. Allaha u naxariisto Axmed Shire. Baryadiisii ugu dambaysay yaanay noqon oo keliya wax aan maanta ka murugoonno ee ha noqoto muraayad aynu isku eegno oo aynu isweydiinno: maxaa damiirkeennii ku dhacay? WQ. Abdirahman Abdishakur Warsame. - @roblaa