لمپی سکن کی وبا خطرناک شکل اختیار کرگئی، زمیندار شدید پریشان صوابی رزڑ میں لمپی سکن کی وبا نے خطرناک صورت اختیار کرلی ہے، جس کے باعث زمینداروں کو شدید جانی اور مالی نقصان کا سامنا ہے۔ یارحسین، یعقوبی، لاگے اور دوبیان سمیت مختلف علاقوں میں بڑی تعداد میں مویشی بیماری سے متاثر ہو رہے ہیں، جبکہ زمینداروں کے مطابق متعدد جانور مر بھی چکے ہیں۔ متاثرہ زمینداروں کا کہنا ہے کہ وہ اپنے بیمار مویشیوں کے علاج اور ویکسینیشن کے لیے سرکاری مراکز گئے، تاہم وہاں ویکسین دستیاب نہیں۔ زمینداروں کے مطابق بیماری پھیلتی جا رہی ہے اور ان کا قیمتی سرمایہ مسلسل خطرے میں ہے۔ زمینداروں نے محکمہ لائیو سٹاک کی عدم توجہی پر شدید تشویش کا اظہار کرتے ہوئے کہا ہے کہ بیماری کے پھیلاؤ سے قبل مؤثر آگاہی مہم اور حفاظتی اقدامات کیے جانے چاہیے تھے، تاکہ وہ اپنے مویشیوں کو بروقت محفوظ بنا سکتے۔ زمینداروں نے سیکریٹری لائیو سٹاک، ڈائریکٹر لائیو سٹاک اور ضلعی انتظامیہ سے پُرزور اپیل کی ہے کہ جنوبی رزڑ کے متاثرہ علاقوں کا فوری دورہ کرکے باقاعدہ سروے کیا جائے، بیمار مویشیوں کی نشاندہی کی جائے اور ویکسینیشن و علاج کے لیے ہنگامی اقدامات کیے جائیں۔ زمینداروں کا کہنا ہے کہ مویشی ان کی روزی روٹی اور قیمتی اثاثہ ہیں، اس لیے حکومت کو اس مسئلے کو محض ایک بیماری نہیں بلکہ دیہی معیشت سے جڑے اہم مسئلے کے طور پر دیکھتے ہوئے فوری اور عملی اقدامات کرنے چاہئیں۔ رپورٹ: مستقیم شاہ باچہ - @mustaqeem.shah.bacha