ပယောဂ ဆရာစစ်ဖြစ်ချင်လျှင် မိမိကိုယ်ကို အရင်ဆုံးဆုံးမပါ ကျွန်တော်သည် ငယ်စဉ်ကတည်းက သမထ၊ ဝိပဿနာတရားများကို ရွေကျင်ဆရာတော်ဘုရားကြီးရဲ့အဆုံးမတိုင်း အားထုတ်လာခဲ့သူတစ်ဦး ဖြစ်ပါသည်။ သရဲခြောက်သည်ဟု နာမည်ကြီးသော သုသာန်များ၊ သိုက်စောင့်များပြားသည်ဟု ဆိုကြသည့် စေတီဘုရားများအထိ သွားရောက် တရားအားထုတ်ခဲ့ဖူးပါသည် ယခုလိုအကြောင်းတွေပြောလို့ ကြွားဝါခြင်းမျိုးမဟုတ်ရပါ မြတ်စွာဘုရားရှင်၏ တရားဓမ္မတွေကအလွန်ပင် အကျိုးကျေးဇူးများလှကြောင်းကို ဓမ္မမိတ်ဆွေများ ဗဟုသုတရစေပြီး တရားဓမ္မများအားထုတ်စေချင်လို့ပဲဖြစ်ပါတယ်ခင်ဗျာ🙏။ ထိုသို့ တရားအားထုတ်လာခဲ့သည့် ကာလတစ်လျှောက်တွင် မိမိ၏ ကိုယ်တွေ့အနေဖြင့် မြင်အပ်၊ မမြင်အပ်သော ပုဂ္ဂိုလ်သတ္တဝါများ၏ အသံကို ကြားရခြင်း၊ အမြင်ဖြင့် တွေ့ရခြင်း၊ မနောအာရုံဖြင့် တွေ့ဆုံရခြင်းများ ရှိခဲ့ပါသည်။ နတ်မင်းကြီးများ၊ သူတော်ကောင်းဝိဇ္ဇာများ၊ သိုက်နန်းရှင်များနှင့်လည်း ယနေ့အချိန်အထိ တွေ့ဆုံစကားပြောဆိုလျက်ရှိပါသည်။ ယခုလို သိပ္ပံခေတ်ကြီးတွင် ထိုအကြောင်းများကို ပြောပြလျှင် လူတိုင်းက ယုံကြည်ကြမည် မဟုတ်ပါ။ ယုံကြည်ရန်လည်း မတိုက်တွန်းပါ။ မိမိကိုယ်တိုင် တရားဓမ္မကို စနစ်တကျ အားထုတ်ကြည့်ခြင်းအားဖြင့် မိမိ၏ အတွေ့အကြုံကို မိမိကိုယ်တိုင်သာ သိမြင်နိုင်ပါလိပ်မည်။ သို့သော် ယနေ့ခေတ်တွင် အပမှီသည်ဟုဆိုကာ ပယောဂခံရသူများကို ပါးရိုက်ခြင်း၊ ရိုက်နှက်ခြင်းတို့ဖြင့် ကုသနေကြသည့် အပြုအမူများကိုလည်း အမြဲလိုလို တွေ့မြင်နေရပါသည်။ အမှန်တကယ် ဓမ္မနှင့်နီးစပ်သော ဆရာကောင်းတစ်ဦး၏ အခြေခံမှာ လူအထင်ကြီးစေရန် မဟုတ်ပါ။ မိမိကိုယ်တိုင် သီလ၊ သမာဓိ၊ မေတ္တာနှင့် တရားဓမ္မကို အရင်ဆုံး အားထုတ်ထားခြင်း ဖြစ်ပါသည်။ ရှေးဆရာကြီးများထံတွင် အင်းအိုင်မန္တန် စသည့်ဆေးပေါက်ခြင်း အစဉ်အလာများ ရှိခဲ့လျှင်ပင် သတ္တဝါများအပေါ် မေတ္တာထားခြင်း၊ မထိခိုက်စေခြင်းတို့သည် အရေးကြီးသော အခြေခံဖြစ်ပါသည်။ ယနေ့တွင် လူအထင်ကြီးအောင် ဆေးအင်းအိုင်များစွာ ထိုးပါက်ထားရုံ အပြင်အဆင်များ တပည့်များမွေးကြပြီး ဆရာအထာ ပြုထားရုံနှင့် သူတော်ကောင်း အကြားအမြင်ရရှိထားသောသူ ဟု မဆိုနိုင်ပါ။ တစ်နေ့ကပင် ကျွန်တော့်အိမ်သို့ ပဌာန်းဆက်မှန်၍ ရောက်လာသူများထဲမှ တစ်ဦးကို တွေ့ရပါသည်။ နဖူး၊ ရင်ဘတ်၊ လက်တို့တွင် အနီရောင်ဆေးများ ထိုးထားပြီး မျက်လုံးကို မှိတ်ကာဖြင့် အကြားရသလိုလို၊ အမြင်ရသလိုလို ပြုလုပ်နေခဲ့သော်လည်း ၄င်းနားမှ ပုဂ္ဂိုလ်ရောက်ရှိလာသည်ကို မသ်ိရှာပါဘူး။ ဒါကြောင့် တကယ်ပင် ဆရာလုပ်ချင်လျှင် မိမိကိုယ်ကို အရင်ဆုံး ဆုံးမပါ။ ၁။ ဆရာကြီးဖြစ်ချင်သည့် စိတ်ကို လျှော့ချပါ။ ၂။ မသိသေးသောအရာကို သိသကဲ့သို့ မပြောပါနှင့်။ နတ်ဒေဝတာများအကြောင်း မသိလျှင်လည်း လူအထင်ကြီးစေရန် နတ်ဒေဝတါများကို မိမိတို့ရဲ့လက်အောက်ငယ်သားအခိုင်းအစေပုံစံဖြင့် တောပြောတောင်ပြော မပြောပါနှင့်။ ၃။ ငါးပါးသီလကို အရင် လုံခြုံအောင် စောင့်ထိန်းပါ။ ၄။ တရားဓမ္မကို ကြိုးစားအားထုတ်ပါ။ ၅။ မြင်အပ်၊ မမြင်အပ်သော သတ္တဝါအားလုံးအပေါ် မေတ္တာထားပါ။ အမှန်တကယ် မသိသေးဘဲ လူများရှေ့တွင် ဆရာအထာဖြင့် ပြုမူပြောဆိုခြင်းသည် မသိသေးသူများရှေ့တွင် အထင်ကြီးစရာ ဖြစ်နိုင်ပေမယ့်၊ အမှန်တကယ် သိမြင်နားလည်သူများရှေ့တွင်မူ မိမိ၏ အားနည်းချက်ကိုသာ ဖော်ပြနေခြင်း ဖြစ်ပါသည်။ ကောင်းတာလုပ်ရင် ကောင်းတာဖြစ်မည် မကောင်းတာလုပ်ရင် မကောင်းတာဖြစ်မည်။ မိမိ၏ သီလနှင့် စိတ်ကို စောင့်ရှောက်ခြင်းကသာ အဓိက ဖြစ်ပါသည်။ ယခုစာကို ရေးသားမျှဝေရခြင်းမှာ မည်သူ့ကိုမျှ ထိခိုက်စေလို၍ မဟုတ်ပါ။ ဓမ္မမိတ်ဆွေများအနေဖြင့် အကြားအမြင်၊ ပယောဂ၊ နတ်ဒေဝတာ စသည့်အရာများထက် မိမိ၏ သီလ၊ သမာဓိ၊ပညာ စသည်များနှင့် တရားအားထုတ်မှု ကိုသာ ပို၍ အလေးထားကြပါ။ ရတနာမြတ်သုံးပါးကိုသာ အမြတ်ဆုံးထား၍ ကိုးကွယ်ဆည်းကပ်ကြပါ။ တရားဓမ္မကို တစိုက်မတ်မတ် အားထုတ်ကြပါ။ မြင်အပ်၊ မမြင်အပ်သော သတ္တဝါအားလုံးအပေါ် မေတ္တာပို့ကြပါ။ မိမိစိတ်၌ မေတ္တာနှင့် တရားဓမ္မတို့ကို တိုးပွားလာခြင်းသည်ပင် မည်သည့်အတွေ့အကြုံမဆို တန်ဖိုးရှိသော အောင်မြင်မှုတစ်ရပ် ဖြစ်လာပါလိပ်မည်။ မိမိကိုယ်ကို ဆရာလုပ်နိုင်ခြင်းက သူတစ်ပါးကို ဆရာလုပ်ခြင်းထက် ပို၍ အရေးကြီးလှပါသည်။ Aung Kyaw Htay - @aung.kyawhtay36