لو عندك زول ممتحن الشهادة السودانية خليهو يقرا القصة دي ❤️ القصة دي للباشمهندس السوداني محمد نورين، وعجبتني شديد خصوصاً في التوقيت ده. سنة 1998 محمد امتحن الشهادة السودانية وجاب 78%، وكان حلمو وقتها يدخل أكاديمية كرري التقنية العسكرية، وفعلاً نسبتو كانت الحد الأدنى المطلوب ودخل المعاينات وقعد فيها حوالي 3 شهور. الزول كان خلاص مرتب حياتو كلها على الموضوع ده، العسكرية البحبها والهندسة العايزنها ليهو أهلو في مكان واحد. لكن النتيجة ظهرت… لم يُقبل. رجع البيت وقعد جنب امو وبكى. امو قالت ليهو: "يا ولدي الخير في ما اختاره الله، ربنا كتب ليك حاجة احسن منها… اصبر بس وشوف بعينك." بعدها القراية تقريباً طلعت من راسو، واشتغل طلبة ونقاشة وبعدها مع ود عمتو في التكييف. وكان عندو حاجة بسميها "مكيف الموية" 😂 يدوهو المكيف وهو حالتو بالبلاء، يصنفرو ويعمل ليهو بهية لحدي الزول يجي يستلمو يقول: ده جديد؟ مرت 98 والناس دخلت جامعاتها، وجات 99 ودفعة جديدة امتحنت ودخلت الجامعات، وهو لسه شغال في المكيفات. لحدي سنة 2000 أبوه ناداه وسألو: "يا ولدي الكلام البتعمل فيهو ده ما بينفع، خطتك شنو؟" قال ليهو: "والله يا أبوي ما عندي خطة… الخطة الوحيدة المتأكد منها إنو بكرة عندي مكيفين في الطائف." 😂 أبوه قال ليهو يا تقدم بنتيجة 98 للجامعة، يا تعيد الشهادة. اختار يعيدها. كان باقي تقريباً 6 شهور، رجع طلع كتبو القديمة وبدأ يقرا فوق ال5 ساعات في اليوم، ساعتين الصباح و3 بالليل. عرس بقرا، عيد بقرا، تعبان بقرا، زهجان برضو بقرا. عمل جدول وكان كل يوم بكتب لنفسو قريت شنو، فهمت شنو، وشنو الما فهمتو ومحتاج يسأل فيهو زول. امتحن منازل. لما ظهرت النتيجة مشى يستلمها من الوزارة، والموظف كان بينادي الأسامي ويدي كل زول ورقتو. لما وصل اسمو، الموظف وقف وقال: "ما شاء الله." محمد استلم الورقة ولقى: 91.4% رياضيات 100 كيمياء 96 فيزياء 95 وهو ذاتو بحكي إنو قبل اللحظة دي كان مفتكر الناس البجيبوا تسعينات ديل ربنا خلقهم براهم 😂 رجع لأمو وقال ليها جبت 91، ما صدقتو، افتكرتو بهظر معاها لحدي ما بكى وعرفت إنو بتكلم جد. والقصة الجميلة إنو الموضوع ما وقف في الـ91. محمد بعد داك دخل الهندسة الكهربائية في جامعة الخرطوم، وبعدها اشتغل أكتر من 10 سنوات في Schlumberger وتنقل في شغلو بين السودان وأنغولا وتكساس، وبعدها وصل Apple واشتغل فيها كمهندس برمجيات مدمجة. وبرضو ما نسى السودان، اسس فريق زول هاكس واشتغلو على مشروع طائرة مسيّرة لنقل الدم والأمصال والمواد الطبية، ووصل صرفو الشخصي على المشروع لأكتر من 100 ألف دولار. يعني الزول البكان في 1998 واقف قدام كشف مكتوب جنب اسمو "لم يُقبل"، وبعدها بقى معروف في السوق بـ "نورين بتاع المكيفات"… ما كان عارف الحاصل بعد كم سنة. عشان كدا لو نتيجتك بكرة ما جات زي ما داير، ازعل عادي، لكن ما تتعامل معاها كأنها حكم نهائي على حياتك. يمكن الحاجة الإنت شايفها الليلة نهاية، بعد كم سنة تعرف إنها كانت بس تغيير طريق. وأجمل حاجة قالها نورين في قصتو بالنسبة لي: "الكلام الحقيقي عن اللحظة البتقرر فيها إنك ما حتخلي الظروف تحدد نهايتك." ربنا يفرح كل الممتحنين وأهلهم بكرة، ويكتب ليهم الخير وين ما كان ❤️🇸🇩 - @jopsplatform