អហំ នមោសិរោរាប កាព្យបុរាណ *អហំនមោសិរោរាប ឱនកាយបន្ទាបក្រាបវន្ទា សូមពោលសម្ដែង ថ្លែងពណ៌នា វន្ទាគោរពព្រះគុណថ្លៃ ។ *មាតាបិតាបង្កើតកាយ គុណធ្ងន់ជ្រៅឆ្ងាយផុតវិស័យ ធ្ងន់លើសប្រឹថពីឥតឧបមេយ្យ ខ្ពស់ហួសវិស័យសុមេរា។ *កាលពីកូននៅក្នុងឧទរ មាតាថ្នមទ្រគ្រប់ឥរិយា ប្រសូតកូនរួចមកកាលណា មាតាប្រទាននូវទឹកក្សីរ៍។ *មាតាបិតាថ្នមពរលាង បញ្ចេញសូរសៀងច្រៀងបំពេរ បបោសអង្អែលសព្វកាយេ ព្រះមេមានគុណធ្ងន់ជ្រៅឆ្ងាយ។ *បពិត្រមាតានិងបិតា កូននឹកខ្លោចផ្សាពេកអប្បាយ តាំងពីកូនកើតមានរូបកាយ អ្នកតែងខ្វល់ខ្វាយថែរក្សា ។ *ឱះឱ!ម្ចាស់ថ្លៃវិសេសលន់ អ្នករងទុក្ខធ្ងន់ពន់ពេកណា ព្រោះអ្នកខំបីបាច់ស្ងួនភ្ងា ពុំអាចពណ៌នាឱ្យអស់បាន។ *ដូច្នេះកូនសូមផ្គងអញ្ជលី លើហត្ថទាំងពីរបន្ទន់ប្រាណ បង្គំបាទាព្រះក្សេមក្សាន្ដ ទោសខុសប៉ុន្មានសូមប្រណី។ *ម្ចាស់អើយ!កាលកូនទ្រហោយំ អ្នកស្ទុះមកថ្នមត្រកងបី ច្រៀងបំពេកូនដោយប្រិមប្រិយ ដោយចិត្តមេត្រីផ្ដេកកូនណា។ *ទឹកមាត់ទឹកម៉ូតលាមកផង លាងគ្រឿងសៅហ្មងផងនានា អ្នកចាប់អ្នកកាន់អ្នកស្រវា លាងដោយហត្ថាឥតជិនឆ្អន់។ *បពិត្រអ្នកម្ដាយមានករុណា បិតាមានគុណវិសេសលន់ កូនសូមគោរពព្រះគុណធ្ងន់ សូមព្រះសោភ័ណបានក្សេមក្សាន្ដ។ *ដូច្នេះកូនសូមឧទ្ទិសផល តម្កល់ចេតនាដោយក្លាហាន ទានសីលភាវនាដែលកូនបាន កសាងប៉ុន្មានជូនទៅអ្នក ។ *សូមលោកទទួលដោយសោមនស្ស ចិត្តកូនត្រង់ស្មោះចំពោះជាក់ ដូចកូនបានពោលពាក្យសច្ចៈ សូមជូនទៅអ្នកគ្រានេះហោង ។ ចប់ - @sokphlauch5