ضحى بروحه للعراق.. كافئوه بـ 24 مليون دين على ايتامه هذا جزاء الشهيد علاء الصبيحاوي؟ عائلته ببيت تجاوز وامه فاقدة بصرها من يوم استشهاده وين صندوق شهداء الشرطة؟ وين مؤسسة الشهداء؟قصة الشهيد الملازم علاء عبد الحسين الصبيحاوي معروفة بميسان، كان ضابط بسوات ميسان واستشهد بمعارك تحرير الموصل سنة 2017. وعائلته فعلا وضعها تعبان وساكنة تجاوز، مثل ما قال الولد. شنو سالفة الـ 24 مليون؟ بالجيش والشرطة من تفقد سلاحك او عتادك، حتى لو بالمعركة، الحسابات تفتح مجلس تحقيقي ويحملوك سعر المواد المفقودة. يسموها لجنة التضمين. يحسبون البندقية، المخازن، الجعبة، الاطلاقات... والطلقة الوحدة حسابها بالداخلية فعلا 5000 دينار. فاذا عنده عتاد كامل مفقود بالمعركة يطلع رقم 20-25 مليون طبيعي جدا. الاجراء اللي اجاهم من كاتب العدل - اشعار استقطاع من الورثة - هو اجراء روتيني قديم لتحصيل ديون الدولة. مو معناها راح ينقطع راتب الشهيد. ليش هذا الاجراء باطل قانوناً؟ القانون العراقي يعفي الشهيد: 1. شهداء الاجهزة الامنية بوزارتي الدفاع والداخلية مشمولين بقانون ضحايا الارهاب ومؤسسة الشهداء وتم شمولهم بكل الحقوق والامتيازات. 2. وزارة الداخلية نفسها عندها صندوق شهداء الشرطة وواجبه دعم عوائل الشهداء مو مطالبتهم، ووزير الداخلية عبد الامير الشمري قبل فترة صادق على تحويل 1314 من المتوفين اثناء الخدمة الى راتب شهيد يعني توجه الوزارة الحالي هو انصافهم. 3. تعليمات وزارة الداخلية: اذا الفقدان كان بسبب الاستشهاد او الاصابة اثناء الواجب، لازم شطب المواد وغلق التضمين، مو تحميل العائلة. اللي صار ان المجلس التحقيقي الاولي انكتب روتين "فقدان عتاد" بدون ما يكتبون "بسبب الاستشهاد في ساحة المعركة" وبقى معلق من 2017 ولحد هسه. شنو الحل؟ 3 طرق لازم تمشي سوة 1- الحل الاداري وهو الاهم: عائلة الشهيد او اي احد وكيل عنهم يروح لقيادة شرطة ميسان - الشعبة القانونية ويطلب: • نسخة من المجلس التحقيقي الخاص بالشهيد • يقدم طلب اعادة تحقيق وشطب يكتب بيه: "نطلب شطب المواد كون فقدانها كان بسبب استشهاد الضابط اثناء الواجب في الموصل" • الطلب يترفع من قيادة شرطة ميسان الى مديرية الشؤون القانونية بوزارة الداخلية والى لجنة شطب الاسلحة والاعتدة. 2- الحل عن طريق صندوق شهداء الشرطة: تقديم مناشدة مباشرة الى مكتب وكيل وزير الداخلية لشؤون الشرطة او عن طريق منصة عين العراق للشكاوى - اكتب "مطالبة بإلغاء تضمين الشهيد علاء الصبيحاوي وشطب عتاده استنادا لكونه شهيد واجب". هذا الصندوق هو اللي يلغي التضمين بكتاب واحد. 3- الحل البرلماني والقانوني: • مراجعة مؤسسة الشهداء فرع ميسان لضمان حقوقهم الكاملة (قطعة ارض، منحة، راتب). • اذا ما انحل بالادارة، محامي يقدم طعن بقرار التضمين امام محكمة القضاء الاداري خلال 30 يوم من التبليغ، والقضاء دائما يلغي هيج تضمين لانه مخالف لقانون مؤسسة الشهداء. قانونا ما يحق لهم يقطعون راتب الشهيد ولا يطالبون الايتام، لان راتب الشهيد محمي بقانون#وزارة_الداخليه #شهيد_علاء_الصبيحاوي #حقوق_الانسان #ميسان #شهداء_العراق_ذكرى_لا_ينساها_الجميع - @bvf2.6