ရန်ကုန်မြို့၊ လှိုင်၊ ဒေါပုံနှင့် သာကေတတို့တွင် စစ်မှုထမ်းရန် လူငယ်များကို ညပိုင်းအိမ်ပေါ်အထိတက်ဖမ်းဆီးခြင်းနှင့် အိမ်စီးကားများဖြင့် လိုက်လံဖမ်းဆီးမှုများ အလွန်များပြားနေ ရန်ကုန်၊ စက်တင်ဘာ ၁၃ ရန်ကုန်တိုင်းအတွင်း လှိုင်၊ ဒေါပုံနှင့် သာကေတမြို့နယ်များတွင် စစ်မှုထမ်းရန်ဟုဆိုကာ လူငယ်များကို ရပ်ကွက်အုပ်ချုပ်ရေးအဖွဲ့များနှင့် ပူးပေါင်းအဖွဲ့များက နေအိမ်များအထိ ဝင်ရောက်ဖမ်းဆီးခြင်း၊ ကားမှတ်တိုင်များတွင် စောင့်ဆိုင်းဖမ်းဆီးခြင်းနှင့် မော်တော်ယာဉ်များဖြင့် လိုက်လံရှာဖွေဖမ်းဆီးခြင်းများ ပြုလုပ်နေကြောင်း ဒေသပြည်သူများနှင့် တော်လှန်ရေးကင်းထောက် သတင်းရင်းမြစ်များထံမှ သိရသည်။ ယမန်နေ့ စက်တင်ဘာလ ၁၂ ရက် ညပိုင်း လှိုင်မြို့နယ်၊ အမှတ် ၁၅ ရပ်ကွက်၊ အမှတ် (၈) သစ်စက်အတွင်း နေထိုင်သည့် လူငယ်တစ်ဦးကို ရပ်ကွက်အုပ်ချုပ်ရေးမှူး ဝင်းမြင့်၊ ရာအိမ်မှူး ဝက်ကြီး (ခ) မျိုးမင်းထွန်း၊ ရာအိမ်မှူး စိန်သန်းလေးနှင့် ရာအိမ်မှူး ဝင်းဇော်ထွန်းတို့က နေအိမ်အထိ တက်ရောက်၍ ဖမ်းဆီးခေါ်ဆောင်သွားကြောင်း ရပ်ကွက်နေပြည်သူများက ပြောဆိုသည်။ ဖမ်းဆီးခံရသူမှာ ဧည့်စာရင်းဖြင့် နေထိုင်သူဖြစ်ပြီး ဧည့်စာရင်းကြေးအပြင် စစ်မှုထမ်းရန် လူမဖမ်းရန်နှင့် လူအစားထိုးပေးနိုင်ရေးအတွက်ဟုဆိုကာ ကောက်ခံသည့် စစ်မှုထမ်းကြေးငွေကြေးများကိုလည်း လစဉ် ပုံမှန်ပေးဆောင်ထားသူဖြစ်ကြောင်း ဒေသခံများက ဆိုသည်။ ပေါ်တာဆွဲ ဖမ်းဆီးခံရသော လူငယ်အမျိုးသားတွင် ကလေးငယ် ၂ ဦးရှိပြီး စားဝတ်နေရေးအခက်အခဲရှိသည့် မိသားစုဖြစ်ကြောင်း သိရသည်။ “ညက ဆွဲသွားတဲ့ကလေးက ဧည့်စာရင်းနဲ့ နေတာပါ။ ဧည့်စာရင်းဖိုး၊ စစ်မှုထမ်းဖို့ ငွေကောက်တော့လည်း အကုန်ပေးပါတယ်။ ဆွဲခံရတဲ့လူငယ်မှာ ကလေး ၂ နှစ်ကျော်အရွယ် ကလေးနှစ်ယောက်ရှိတယ်။ တကယ်လည်း မရှိရှာပါဘူး။ ဟိုလူကကျွေး၊ ဒီလူကကျွေးတာကို စားနေရတဲ့ မိသားစုပါ။ ဒါကို အခွင့်ကောင်းယူပြီး အိမ်ပေါ်အထိတက်ပြီး ဆွဲသွားပါတယ်” ဟု ဒေသခံတစ်ဦးက ပြောသည်။ လှိုင်မြို့နယ်၊ အမှတ် ၁၅ ရပ်ကွက်အတွင်း စစ်မှုထမ်းရန် လူမဖမ်းရန်နှင့် လူအစားထိုးပေးနိုင်ရေးအတွက်ဟုဆိုကာ ပြည်သူများထံမှ ငွေကြေးကောက်ခံနေပြီး ၅ လစာအတွက် ကျပ် ၇၅,၀၀၀ ပေးဆောင်နေရကြောင်းလည်း ရပ်ကွက်နေပြည်သူများက ပြောဆိုသည်။ သို့သော် ထိုသို့ ငွေကြေးကောက်ခံနေသည့်အပြင် စစ်မှုထမ်းရန် လူစုဆောင်းရာတွင် ရပ်ကွက်အတွင်းရှိ လူငယ်များကို ဖမ်းဆီးခေါ်ဆောင်ကာ မြို့နယ်အထွေထွေအုပ်ချုပ်ရေးဦးစီးဌာနထံ ပေးပို့နေကြောင်း ဒေသခံများက ပြောဆိုသည်။ လှိုင်မြို့နယ်အထွေထွေအုပ်ချုပ်ရေးဦးစီးဌာနဘက်က စစ်မှုထမ်းရန် လူတစ်ဦးလိုအပ်ကြောင်း ပြောဆိုပါက ရပ်ကွက်အုပ်ချုပ်ရေးအဖွဲ့က လူ ၃ ဦးခန့် ဖမ်းဆီးပြီး တစ်ဦးကို မြို့နယ်အထွေထွေအုပ်ချုပ်ရေးဦးစီးဌာနထံ ပေးပို့ကာ ကျန် ၂ ဦးကို အခြားနေရာများသို့ စစ်မှုထမ်းလူစားထိုးအဖြစ် ရောင်းစားကြခြင်းနှင့် ငွေညှစ်ခြင်းများ လုပ်ဆောင်ကြကြောင်း သိရှိရသည်။ “မြို့နယ်ထွေအုပ်က စစ်မှုထမ်းလူတစ်ယောက်လိုတယ်ပြောရင် သူတို့က သုံးယောက်လောက် ဖမ်းဆီးပြီး တစ်ယောက်ကို မြို့နယ်ထွေအုပ်ကို အပ်တယ်။ နောက်ထပ် ဖမ်းထားတဲ့ လူနှစ်ယောက်ကိုတော့ အခြားတစ်နေရာမှာ တရားမဝင်အချုပ်ခန်းလုပ်ထားပြီး ချုပ်ထားတယ်။ တစ်ယောက်ကို သိန်း ၅၀ နဲ့ ရောင်းစားနေကြတာပါ။ တော်တော်လေးကို ဥပဒေမဲ့လွန်းနေပြီ” ဟု ဒေသခံတစ်ဦးက ပြောသည်။ အလားတူ ဒေါပုံမြို့နယ်၊ ဝက်စုမှတ်တိုင်တွင်လည်း စက်တင်ဘာလ ၆ ရက် နေ့လယ် ၁၂ နာရီခွဲခန့်က ကားစောင့်နေသည့် လူငယ်တစ်ဦးကို ပျူစောထီး ၅ ဦးပါအဖွဲ့က ဟွန်ဒါဖစ် အပြာနုရောင် မော်တော်ယာဉ် နံပါတ် 2K/6964 ဖြင့် လာရောက်ဖမ်းဆီးခေါ်ဆောင်သွားကြောင်း သိရသည်။ အဆိုပါ ဖမ်းဆီးမှုတွင် ဝက်စုမှတ်တိုင်ရှိ ကယ်ရီသမားအချို့ ပါဝင်ပတ်သက်မှုရှိနိုင်ပြီး ဖြစ်စဉ်ကို သိရှိသော်လည်း မသိဟန်ဆောင်နေကြသည်ဟု မျက်မြင်တွေ့ရှိသူများက ပြောဆိုသည်။ ထို့အတူ သာကေတမြို့နယ်တွင်လည်း နယ်ထိန်းရဲ ခင်မောင်ဦး ဦးဆောင်သည့်အဖွဲ့က လူငယ် ၄ ဦးမှ ၅ ဦးခန့်ကို ကားပေါ်တွင် ခေါ်ဆောင်ကာ လမ်းများနှင့် ကားမှတ်တိုင်များတွင် ဆင်း၍ လူငယ်များကို လိုက်လံရှာဖွေဖမ်းဆီးနေကြောင်း မျက်မြင်တွေ့ရှိသူများက ပြောသည်။ ပစ်မှတ်ထားသူများကို မတွေ့ရှိပါက ကားပေါ်ပြန်တက်ကာ အခြားမြို့နယ်များသို့ ဆက်လက်သွားလာပြီး လူငယ်များကို ရှာဖွေဖမ်းဆီးနေကြောင်း ဆိုသည်။ ထို့အပြင် သာကေတမြို့နယ်၊ မြို့မ ၁၅ လမ်းထိပ်ရှိ ဆီဆိုင်မှတ်တိုင်အနီးတွင် ယခုရက်ပိုင်းအတွင်း အရေးပေါ်ကားတစ်စီး အမြဲရပ်ထားသည်ကို တွေ့ရပြီး လူငယ်များကို ဖမ်းဆီးခေါ်ဆောင်ရန် အသင့်ပြင်ဆင်ထားခြင်းဖြစ်နိုင်သည်ဟု ဒေသခံများက ပြောဆိုသည်။ ရန်ကုန်မြို့အတွင်း စစ်မှုထမ်းဥပဒေကို အကြောင်းပြု၍ လူငယ်များကို ဖမ်းဆီးခေါ်ဆောင်ခြင်း၊ ပေါ်တာဆွဲခြင်းနှင့် ဖမ်းဆီးပြီးနောက် ငွေကြေးတောင်းခံခြင်းများ မကြာခဏဖြစ်ပွားနေကြောင်း လူငယ်များ၏ မိဘအချို့က ပြောဆိုသည်။ လက်ရှိတွင် လှိုင်၊ ဒေါပုံနှင့် သာကေတမြို့နယ်များအတွင်း စစ်မှုထမ်းရန် လူစုဆောင်းမှုများနှင့် လူငယ်များအား လိုက်လံဖမ်းဆီးမှုများကြောင့် လူငယ်များနှင့် မိသားစုဝင်များအကြား စိ - @zayartbz7news