أنا ما بطلب منك حاجة فوق طاقتك، ولا بطلب حب ما موجود في قلبك… أنا بس عايزة أعرف أنا شنو بالنسبة ليك، ومكاني وين في حياتك. تعبت من المشاعر المعلّقة، من الكلام البخليني أتمسك بيك، ومن التصرفات البتخليني أشك في كل حاجة. تعبت من إني أحاول أفهمك من بين السطور، وأفتش عن اهتمامك في تفاصيل صغيرة، وأبرر ليك غيابك وبرودك كل مرة. أنا لما أهتم، بهتم من قلبي. ولما أحب، بدي مشاعري بصدق، وما بعرف أكون موجودة بنص قلب أو بنص اهتمام. وعشان كدا، من حقي ألقى قدامي شخص واضح، عارف هو عايز شنو، وعارف أنا شنو بالنسبة ليه. ما عايزة أكون خيار وقت الفراغ، ولا ملجأ وقت الوحدة، ولا شخص تخاف تخسره لكن ما تعرف تحافظ عليه. عايزة أكون شخص وجوده يعني ليك، غيابه يفرق، ومكانته محفوظة في قلبك وأفعالك قبل كلامك. فيا تكون واضح وصريح في مشاعرك ونواياك، وتديني المكانة البستحقها، وتحسسني إن وجودي في حياتك ما صدفة ولا شيء مؤقت… يا الله الغني عنك وعن وجودك. لأني وصلت لمرحلة عرفت فيها إن كرامتي ما مفروض تكون ثمن لحب، وإن الشخص البحبني بصدق ما حيخليني كل يوم أسأل نفسي: «أنا مهمة عنده ولا لا؟» أنا ما بخاف من الرحيل… أنا بخاف أضيع نفسي وأنا بتمسك بشخص ما كان متمسك بي - @dy8nuk2ihykf