@wepesitv: Bi. Felister Akonaay, mwenye umri wa miaka 60, anatarajiwa kufanya Mtihani wa Taifa wa Kidato cha Nne mwezi Novemba mwaka huu katika Halmashauri ya Mji wa Mbulu, akitoa somo kwamba elimu haina ukomo wa umri. Bi. Felister alihitimu elimu ya msingi mwaka 1982, lakini ndoto yake ya kuendelea na sekondari ilikatizwa na changamoto za kifamilia, ikiwemo kifo cha baba yake. Baada ya kuingia katika maisha ya ndoa, kupata watoto na wajukuu, hakuruhusu changamoto hizo kuifuta ndoto yake. Aliamua kurudi darasani na kuanza masomo ya sekondari, ambapo tayari amemaliza Kidato cha Kwanza na cha Pili na sasa anaendelea kujiandaa kwa mtihani wa Kidato cha Nne. Akieleza sababu ya kurejea shuleni, Bi. Felister amesema alikuwa na ndoto ya kwenda sekondari tangu utotoni, lakini hakupata nafasi kwa wakati huo, hivyo alipoipata fursa baadaye maishani akaamua kuitumia kutimiza ndoto yake. Amewataka vijana kutumia vizuri fursa za elimu walizonazo na kusoma kwa bidii ili kufikia ndoto na malengo yao. Walimu wake wamempongeza kwa juhudi, nidhamu na ujasiri aliouonyesha katika safari yake ya elimu, wakisema amekuwa mfano wa kuigwa kwa wanafunzi na jamii kwa ujumla. Safari ya Bi. Felister inabeba ujumbe mzito: kuna ndoto zinaweza kuchelewa, lakini kuchelewa hakumaanishi zimekufa.

WEPESI TV

Open In TikTok:

Region: TZ

Tuesday 15 September 2026 09:41:23 GMT