۔ چیف سیکرٹری خیبرپختونخواہ نے دل جیت لیے۔ گزشتہ دنوں ایک ویڈیو وائرل ہوئی۔ پشاور کی سڑک پر ایک بزرگ بائیکیا ڈرائیور کھڑے تھے۔ ایک شخص ان کے پاس گئے اور پوچھا 'کیا حال ہے؟ اشنغری جانا ہے لیکن میرے پاس پیسے نہیں ہیں۔' بزرگ نے کہا 'بیٹھ جائیں، خیر ہے، کوئی بات نہیں ہے۔ آپ اچھے ہیں یا پیسے؟' اس کے بعد ویڈیو بنانے والے شخص نے پوچھا 'کتنے پیسے کمائے آج؟' بزرگ نے تھکے ہوئے لہجے میں جواب دیا 'یارا، آج تو کچھ بھی نہیں۔۔۔ بس کھڑے ہیں۔' بات کرنے والے شخص نے بزرگ کی حالت دیکھی تو کہا 'آپ کو تو پسینہ بھی اتنا آیا ہوا ہے، گھر بیٹھیں، اتنے بزرگ ہوگئے ہیں۔' یہ سنتے ہی بزرگ خاموش ہوگئے۔ ان کی آنکھوں میں آنسو آگئے۔ اس شخص نے پوچھا 'بیٹے ہیں؟' یہ سن کر بزرگ نے سوال نظر انداز کیا اور کہا 'آجائیں، آپ کو چھوڑ آتا ہوں۔' جب دوبارہ پوچھا گیا کہ 'آنکھوں میں آنسو کیوں آگئے؟' تو بزرگ نے جواب دیا 'بس مجبوری ہے یار۔۔۔' اس شخص نے پوچھا 'کیا مجبوری ہے؟' بزرگ نے بات ٹالتے ہوئے کہا 'چھوڑو یار، یہ باتیں بس اللہ کو پتا ہیں۔' اور پھر بزرگ کی بات درست ثابت ہوئی۔ اللہ کو سب معلوم تھا۔ چند لمحوں کی یہ گفتگو سوشل میڈیا پر وائرل ہوگئی۔ ویڈیو دیکھنے والوں نے بزرگ کی آنکھوں میں چھپی وہ مجبوری دیکھی جسے وہ زبان سے بیان نہیں کر پا رہے تھے۔ اور پھر اسی وائرل ویڈیو نے حکومتی سطح پر بھی توجہ حاصل کی۔ چیف سیکرٹری خیبرپختونخوا سید شہاب علی شاہ نے وائرل ویڈیو کا نوٹس لیا اور بزرگ سے ملاقات کی۔ انہوں نے بزرگ کی محنت اور حوصلے کو سراہا اور ان کے بیٹے کو ملازمت فراہم کرنے کے لیے متعلقہ حکام کو ہدایات جاری کردیں۔ بات صرف ایک بزرگ بائیکیا ڈرائیور کی نہیں۔۔۔ بات اس رویے کی ہے جس کی عوام اپنے افسران سے توقع کرتی ہے کیونکہ ایک عہدہ بڑا ہونا اپنی جگہ لیکن کسی مجبور انسان کی آنکھ میں آیا ہوا آنسو دیکھ لینا اس سے کہیں بڑی بات ہے۔۔۔ کاش ہر اختیار رکھنے والا شخص اپنے دفتر کی کھڑکی سے باہر جھانک کر دیکھے۔۔۔ شاید کسی سڑک پر کوئی ایسا ہی بزرگ کھڑا ہو جو زبان سے کچھ نہ کہہ رہا ہو لیکن اس کی آنکھیں بہت کچھ بتا رہی ہوں۔۔۔ ادیب یوسفزئی #KhyberPakhtunkhwa #viralreelsシ #KPK - @hussain.shakeel140