@uhondo.tv: Madereva wa daladala katika eneo la Kizota Mnada Mpya jijini Dodoma wamesitisha shughuli zao, wakilalamikia hali ya miundombinu ya stendi hiyo na mazingira wanayosema hayawawezeshi kufanya shughuli zao kwa ufanisi. Madereva hao wamesema wamekuwa wakielekezwa kuingia ndani ya stendi kwa ajili ya kupakia na kushusha abiria, lakini wanadai eneo hilo halina baadhi ya huduma muhimu, ikiwemo vyoo na umeme, huku wakieleza kuwa baadhi ya maeneo yana changamoto ya maji. Kwa mujibu wa madereva hao, hali hiyo imewafanya baadhi yao kuendelea kupaki magari nje ya stendi, kando ya barabara, wakitafuta maeneo ya kupata abiria. Mmoja wa madereva hao amesema hawana nia ya kupingana na Serikali, bali wanaiomba Serikali kuangalia changamoto hizo na kuhakikisha stendi inakamilishwa na kuwekwa katika mazingira yanayowawezesha kufanya shughuli zao kwa utaratibu. “Sisi tunaiheshimu Serikali, sisi ni watiifu. Tunaiomba Serikali itusaidie, kwa sababu kule ndani hakuna choo, hakuna umeme na kuna changamoto za miundombinu,” amesema dereva huyo. Madereva hao pia wameeleza kuwa wanahitaji maeneo ya kupakia na kushusha abiria yapangwe vizuri, wakisema kukamilika kwa stendi kutasaidia kuondoa changamoto wanazokutana nazo kwa sasa. Mgomo huo umeibua hali ya kutokuwepo kwa huduma za kawaida za usafiri katika eneo hilo, huku madereva wakisisitiza kuwa wanachohitaji ni utatuzi wa changamoto za stendi ili waweze kuendelea na shughuli zao kwa usalama na utaratibu. #UhondoTVUPDATES

Uhondo TV

Open In TikTok:

Region: TZ

Wednesday 16 September 2026 12:44:06 GMT