⭐️٥ حاجات بعملها مؤخرا بتزود ثقتي في نفسي: ١. اجبر نفسي اعمل حاجات واتكلم مع ناس انا عارفة ان ده ممكن يبان مختلف عن ثقافتي شوية بس فيه فرق ما بين اني بدوس على نفسي لحد ما يبقى معنديش اي طاقة للراحة وما بين اني اتعودت اوي على اني مطلعش برا الكومفرت زون بتاعتي فبقى كل حاجة عايزة اعملها غريبة على عقلي ف واحدة واحدة بقى يحاول يخليني اتجنب اللي عايزة اعمله اكتر عشان بقى بالنسبة له يعتبر خطر. وعشان عقلنا ذكي هيحاول يقنعك بكل الطرق والمنطق انك تأجلي طب شوية طب خططي اكتر. فبقيت بحس بالاحساس ده واقوله شكرا كتر خيرك انا رايحة بردو اكلم الناس دي. واحدة واحدة وثقت في نفسي اكتر بعد ما كنت مش عارفة ابص في وش حد. ٢. بتساءل وببقى فضولية عن القواعد مش باخدها زي ما هي لو فيه قواعد معينة انا حاسة انها موجودة حتى لو متقالتش زي مثلا ان المحتوى المفروض يبقى بالشكل ده او التوقيت ده واني محتاجة امر ب ده قبل ما ده يتفتحلي. مبقتش اصدق كده وخلاص ببقى مهتمة اعرف ليه وكتير بلاقي انه القواعد دي مش حقيقية. ٣. مش بشوف الفيديو كتير قبل ما احطه مش مهم اصنع حاجة مثالية المهم اصنع حاجة على الاقل في المرحلة دي في حياتي ده اللي انا محتاجاه. اصنع حاجات غير مثالية واعبر عن نفسي. كل ما بدي لنفسي مساحة للتعبير كل ما بحس بثقة اكتر. ٤. احاول مخلفش وعودي لنفسي قولت لنفسي هروح التمرين ده، هعمل اي حاجة عشان امسك نفسي من اني الغيه لحد ما يبقى فاضل ١٢ ساعة وساعتها خلاص مش هينفع الغيه اصلا. مش عشان التمرين الواحد ده هيغير حياتي بس لو حد اداك وعد وكسره وكل شوية يعمل كده هتصدقه تاني ليه؟ نفس الحاجة مع نفسنا. عشان تثق فينا محتاجين نبطل نستهون بكسر الوعود ليها. ٥. مش باخد رأي جميع الناس الاول كنت بعمل كده في اكتر فترة مش واثقة في حكمي فيها. اسأل كل الناس وبعد كده استنتج رأيي عشان ابقى في الامان. بس النتيجة سيئة لاني مش بعرف رأيي الحقيقي ابدا. فبقيت دلوقتي احاول اسأل نفسي الاول واتفق على رأيي وبعد كده ابقى اسأل او افتح الكومنتس او ايا يكن. الناس اللي في الكومنتس بتقول انا مليش شخصية عشان سمعت من طرفين وصدقتهم الاتنين، الكلام ده هزار بس عقلنا ع السوشال ميديا بقى يتحول لعقل واحد متكرر عامةً لاننا بنمشي مع اغلبية الكومنتس. محدش فينا بيقف يفكر انا رايي ايه الاول قبل ما يشوف الناس بتقول ايه. اتمنى تكون الافكار دي مفيدة، انتوا الچورنال بتاعي انهاردة ووحشني الڤيديوز دي🥹 - @nairytale