@msumbanews: Mkuu wa Mkoa wa Geita, Alexander Mnyeti, amemuagiza Mkurugenzi wa Halmashauri ya Wilaya ya Chato kutoa gari lake aina ya Land Cruiser V8 na kulitumia kwa kubebea wagonjwa wanaohitaji rufaa katika Kituo cha Afya Muganza, baada ya gari la wagonjwa (ambulance) kuharibika matairi. Mnyeti ametoa agizo hilo wakati wa mkutano wa hadhara na wananchi katika Soko la Kimataifa la Dagaa Kasenda, lililopo katika Halmashauri ya Wilaya ya Chato, mkoani Geita, ikiwa ni sehemu ya ziara yake ya kujitambulisha kwa wananchi.\ Akizungumza katika mkutano huo, Mbunge wa Jimbo la Chato Kaskazini, Cornel Magembe, amemuomba Mkuu wa Mkoa kuhakikisha ambulance ya Kituo cha Afya Muganza inapatiwa matairi mapya ili kurejesha huduma ya usafirishaji wa wagonjwa, hususan wanaohitaji kupewa rufaa kwenda hospitali. Kabla ya kuanza ziara yake ya kujitambulisha kwa wananchi wa Mkoa wa Geita, Mnyeti alianza kwa kutembelea kaburi la aliyekuwa Rais wa Awamu ya Tano wa Jamhuri ya Muungano wa Tanzania, Dkt. John Pombe Magufuli, lililopo Chato. Baada ya hapo, Mkuu huyo wa Mkoa alikutana na baadhi ya watumishi wa Halmashauri ya Wilaya ya Chato na kuwataka kutekeleza majukumu yao kwa bidii, huku wakizingatia kusikiliza na kutatua kero za wananchi kwa wakati. Mnyeti amesema viongozi na watumishi wa Serikali wanapaswa kuelekeza nguvu zao katika kuhakikisha wananchi wanapata huduma bora na changamoto zao zinatatuliwa kwa ufanisi.

Msumba News Blog

Open In TikTok:

Region: TZ

Thursday 17 September 2026 09:16:30 GMT