𝐂𝐎𝐌𝐈𝐍𝐆 𝐔𝐏 𝐍𝐄𝐗𝐓 | 𝐒𝐇𝐄𝐄𝐊𝐇 @Yahya Raaby Toddobaadkan waxaan idiin hayaa barnaamij aan rajaynayo inuu qalbiyo badan taabto, dad badanna beddelo, idanka Alle. Magaalada London ayaan Sheekh Yaxye Rabbii kula yeeshay sheeko qoto dheer oo socotay saddex saacadood. Waxaan kaga wada hadalnay saddex arrimood oo qof kasta oo Muslim ahi u baahan yahay inuu si dhab ah u fahmo: 𝐐𝐀𝐘𝐁𝐓𝐀 𝐊𝐎𝐎𝐖𝐀𝐀𝐃: 𝐍𝐀𝐗𝐀𝐑𝐈𝐈𝐒𝐓𝐀 𝐀𝐋𝐋𝐄 𝐒𝐖𝐓 Qof dembiyo badan galay, Alle weli ma doonayaa inuu usoo laabto? Muxuu Alle qofkii naftiisa ku xadgudbay ugu leeyahay: “Addoomadayda, ha ka quusanina Naxariista Alle”? Qof sannado badan Alle ka baryayey caafimaad, guur, carruur, rizqi ama xal dhibaato, balse aan weli helin wixii uu codsaday, sidee ayuu u fahmayaa dib u dhacaas? Sheekhu wuxuu si fudud oo qoto dheer u sharxay sababta uusan qofna, dembigiisu inta uu doono ha le’ekaadee, xaq ugu lahayn inuu ka quusto cafiska iyo Naxariista Rabbigiis. 𝐐𝐀𝐘𝐁𝐓𝐀 𝐋𝐀𝐁𝐀𝐀𝐃: 𝐉𝐀𝐍𝐍𝐀𝐃𝐀 Jannadu sidee ayay u egtahay? Waa maxay nimcada ugu weyn ee Ahlul-Jannaha la siin doono? Muxuu qofkii adduunka kusoo maray faqri, xanuun, murugo iyo qalbi-jab dareemi doonaa marka uu Jannada arko? Maxaa maanta qalbiyadeenna uga yareeyey hammigii Jannada, iyadoo Saxaabadu adduunka ku dhex noolaayeen, shaqaysanayeen, ganacsanayeen, qoysasna lahaayeen, haddana qalbiyadoodu Aakhiro ku xirnaayeen? Markaad qaybtan daawato, Jannadu kuuma ahaan doonto eray aad maqasho oo keliya. Waxaad dib u eegi doontaa halka aad maanta waqtigaaga, xooggaaga iyo noloshaada ku bixinayso. 𝐐𝐀𝐘𝐁𝐓𝐀 𝐒𝐀𝐃𝐃𝐄𝐗𝐀𝐀𝐃: 𝐓𝐎𝐖𝐁𝐀𝐃𝐃𝐀 Qofku inuu yiraahdo “Astaghfirullaah” keliya ma Towbad baa? Maxaa dhacaya haddii aad si dhab ah u toobad keento, ooydo, Alle cafis weydiisato, haddana isla dembigii ku noqoto? Tawbaddii hore ma buraysaa? Miyaad mar kale Alle usoo noqon kartaa? Sheekh Yaxye wuxuu sharxay in Towbaddu aysan ahayn oohin iyo dareen keliya. Mararka qaarkood waxay kaa rabtaa inaad beddesho saaxiibbadaada, deegaankaaga, xiriirradaada iyo waxyaabaha telefoonkaaga ku jira. Waxay kaa rabtaa inaad xaqii aad qaadatay celiso, dembigii aad ku jirtayna si dhab ah uga dhaqaaqdo. Dhammaadka waxaan weydiiyey: “Haddii qofku podcast-kan damiyo oo uu yiraahdo, caawa waxaan rabaa inaan Alle usoo noqdo, tallaabada ugu horreysa ee uu qaadayo maxay tahay?” Jawaabta Sheekhu ma ahayn hadal guud. Wuxuu tallaabo tallaabo u sharxay waxa qofku samaynayo marka uu muuqaalka damiyo iyo sida uu u bilaabi karo nolol cusub. Waxaan sidoo kale ka hadalnay waxa la gudboon qofka ay labadiisa waalid maanta nool yihiin, iyo dardaarankii qaaliga ahaa ee Sheekh Yaxye hooyadii uga tagtay ee uu ilaa maanta la nool yahay. Barnaamijkan waxaa loogu talagalay qofka dembigiisu ku cuslaaday, qofka rajadiisu yaraatay, qofka Jannada hilmaamay, qofka marar badan isbeddel isku dayay haddana dib ugu dhacay, iyo qofka doonaya inuu Alle usoo laabto balse aan garanayn halka uu ka bilaabo. Marka uu soo baxo, waqti u samee. Meel deggan fariiso. Qalbi furan ku dhageyso. Kadibna la wadaag qof aad ogtahay inuu hadalkan u baahan yahay. Waxaa laga yaabaa in saddexdan saacadood ay noqdaan bilowga isbeddelka aad muddada dheer raadinaysay. 𝐁𝐄𝐑𝐑𝐈 | 𝟒:𝟎𝟎 𝐏𝐌 𝐄𝐀𝐓 𝐊𝐄𝐋𝐈𝐘𝐀 | 𝐓𝐇𝐄 𝐀𝐁𝐃𝐈𝐉𝐀𝐋𝐈𝐈𝐋 𝐒𝐇𝐎𝐖 Sponsorship and Advertising Opportunities: [partnerships@theabdijaliilshow.com](mailto:partnerships@theabdijaliilshow.com). #contenthacks #creatorsearchinsights #contentcreator #growth #creatortools - @abdijaliilosman